Photos & Video：Aldous Lau

（編者按：一連四輯舊裝勞專題，你可能已學到唔少嘢，睇睇埋埋，可能手痕想「實踐」吓，錶評人Aldous從今期起訪問本港多位錶店老闆，講吓佢地收藏腕錶經歷同趣事，當然會醒啲玩舊裝錶嘅貼士畀大家，stay tuned）

不同喜好，去到旺角，有不同目的地，信和兆萬潮特好景家樂現時點，瓊華星際皆旺先達朗豪砵蘭街，各有所求。

從前，廣華街仁安大廈是睇遙控車，買氣槍熱門地；今日，仁安大廈成為睇易手錶，買舊裝勞的a place must go。

日本有中野百老匯商店街，搵舊裝勞力士舊玩具（Mandarake），一定留低不少腳毛同銀兩。

香港，有仁安大廈加現時點，算是睇齊。

想入手玩舊裝勞力士（或舊裝錶），第一站，仁安大廈。

你話，見到如此陣容，點會不心動。舊裝勞力士所散發的魅力，新裝錶沒法子及得上。

舊裝勞力士沒有兩隻是相同，錶面顏色，計時外圈形態，霸的，錶帶，因佩戴習慣，因收藏、打理方法，因當年不同部件供應商……

一句到尾，好好玩！

舊裝勞力士當然不止限於運動錶，36mm的Datejust、Day-Date，甚至較低層次的6694，其實都有一定可觀性及話題性。

灣仔起家

由登打士街方面進入仁安大廈，左手邊的「貴仁」暫且不提（找不到舊裝勞），要注意，是右手邊，「The Vintage Concept」（不如簡單稱為「VC」）：一個令你「跌錢」，又或者心甘命抵「使錢」的地方。

知行情的朋友，應該知道年半前，旺角VC是在港島灣仔，菲林明道譚臣道大有廣場對面（VC亦有中環店，位於擺花街，遲些再作介紹），當年以「成間鋪放滿COMEX同海量史前Panerai」揚名討論區，Ching們互相放毒，筆者亦「身受其害」。

之不過，「你睇我好，我睇你好」，原來，辦公時間後的灣仔，水盡鵝飛，烏蠅已少，更何況是舊裝錶客，加上交通不便（起碼筆者覺得），附近又沒有其他「景點」，所以在2013年11月，灣仔VC變為旺角VC。

無獨有偶，由同年年尾開始，陸陸續續有其他易手錶/舊裝錶鋪進駐仁安大廈，由兩三間變成七八間（個別鋪頭並非全店賣錶）。

仁安大廈近年由「遙控車街．氣槍街」，變為「手錶街」，由「街頭」行到「街尾」，足足有七八間不同形式的手錶鋪頭，比日本中野百老匯商店街更精彩！

The Vintage Concept旺角店有兩個入口，造就有兩個大廚窗，可以displsy更多錶款。

玩精工

同旺角VC掌舵人Patrick詳談「入火坑」經過。

玩錶廿幾年，第一隻令Patrick著迷的舊裝錶是一隻60年代的精工

（Patrick即時在夾萬內取出當年令其「誤入歧途」的Seiko SilverWave），

「應該是1988年的事，剛剛考完公開試，去到摩囉街，在地攤見到這隻錶，當年竟然不知是精工，見是自動，又有計時圈，$350，就買下來。

「得錶頭一個，無所謂，當年不太講究。幾年後，在鴨寮街找到另一隻同款的、condition好差的，不過條鋼帶就好完整，二合一，SilverWave得以回復本來面目。」

併併湊湊，亦是玩舊裝錶的樂趣，當然，「對期，真件，無損原裝性」先可以接受。

將喜好變成事業，寓工作於娛樂，玩舊裝錶的，一定好羨慕Patrick。筆者真心好羨慕，日日換錶戴，引死班朋友，有得玩又做到生意，何樂而不為。

引領Patrick跳入火坑的元兇，就是這隻精工錶：Seiko Sportsmatic SilverWave。不銹鋼錶殼，日本製，Diashock 17石自動機芯，30m防水，霸的設在4字位，設有內雙向式計時圈。屬60年代出品。

從前辛苦現在幸福

墮坑廿載，Patrick不禁倒抽一口涼氣，「當年玩舊裝錶，上網未普及，搵資料靠睇日本雜誌，又不懂日文，純粹看圖識字，睇相，死認。或者去賣舊裝錶的鋪頭（古董店）打躉傾個飽，同老闆混熟後就會醒你（筆者都覺得此招萬試萬靈）。，不過，由於當年玩錶要求低，不講求對期，平買平玩，樂在其中，偶然放賣有錢賺，就加碼換隻再靚一點。如是者，論錶款，幾乎玩齊。」

而更重要是，儲到多桶金。

今時今日，玩舊裝錶好比做功課，要上網搵一大批資料，對這對那，又怕買錯又怕買假，如此辛苦自己，為的是戴上手後的與別不同，戴上手後的不絕話題，Facebook有幾多個Like，討論區有幾多個多謝分享。

值得嗎？百分百值得！

採訪當日，Patrick手戴一隻極罕見舊裝勞力士：50年代Datejust，格仔面（或稱Honeycomb面），36mm直徑，以當年的標準，是一隻大錶，今日，只算boy size。市值$420,000。

舊裝精工錶、Tag Heuer，近年開始流行

有人追求紙、盒齊，有人追求gilt面，有人喜歡金，有人獨愛鋼，落點工夫，做點功課，當一門學問般看待，邊玩邊學，自會覺得心安理得，錢，亦俾得值得。

講個信字

旺角VC的新．舊裝錶比例約為3：7，而舊裝錶中有八成是勞力士，其次有Panerai，Omega。Patrick表示，玩舊裝錶，首推是勞力士，以運動錶款為主力，而Panerai，則是Pre-V（即Panerai被Vendôme收購前的型號，其後Richemont買下Vendôme所有股份）同A頭，以及部分T-Dial型號。

玩舊裝錶，最怕買到假錶！

Patrick拍心口，「其實行得入鋪頭買，好少機會買到假錶，打開門做生意，又裝修又人工，不會為一萬幾千搞壞商譬。上網買反而存在風險，除非講明『包上行』（即上維修中心驗證），否則就要諗諗。

「買舊裝錶，要識睇幾個位，算是基本功：睇錶殼有否打磨，適量打磨可以接受；錶面有否翻填，直接影響其價值；流水號（serial number）有否翻刻，手錶身世不明。至於對不對期，是另一個課題。」

完全認同，錶海亦是無涯，努力學習。

（待續）

遇著舊裝錶棘手問題，筆者（左）會WhatsApp或者親身（出開旺角的落話）問Patrick（右），

煩他一個半死為止……「搞搞震冇幫襯」相信是玩舊裝錶的人的強項。