雖然話演員、歌手、網紅、YouTuber等大致上都係「娛樂圈」嘅人，但喺香港，呢啲不同嘅「身份」大多係涇渭分明，就算有YouTuber可以去拍戲，大家都只當佢係「拍戲嘅YouTuber」。但喺日本，不同娛樂圈工作之間嘅分野就相對小得多，猶其寫真界就可謂海納百川，業界歡迎之餘，又大家都好想拍。好似今晚要介紹嘅呢位「森元流那」咁，即使係「百萬YouTuber」，一樣會為雜誌拍攝寫真。

現年21歲嘅「森元流那」，初中畢業後就冇讀書，而係去咗大阪嘅居酒屋打工。之後曾於2018年參加東京電視台節目《青春高校3年C組》嘅試鏡，不過就落選而回。但同年佢就成功出演Abema TV嘅著名戀愛真人騷《今日、好きになりました。》打響名堂。2019年時佢與「山岸稜大」及「田村美優」共同創立YouTube頻道《ばんばんざい》，至今已有超過270萬訂閱，個人IG有140萬追蹤，就算只係佢嘅個人YouTube都有超過70萬訂閱——無錯，上面話佢係「百萬YouTuber」其實已經謙虛咗。

而由2022年起，佢就挾住極高網上人氣進軍寫真界，先係2022年2月推出20歲紀念寫真集，然後去年先後三次登上《FLASH》，可見其人氣之盛。

由於佢係《ばんばんざい》年紀最少嘅成員，加上佢個樣本身就好青春，所以有「YouTuber妹妹」嘅稱號。但事實佢喺屋企其實係「大家姐」，下有三個細佬兩個細妹，更驚人嘅係佢對上仲有四個阿哥，成家湊齊「十兄弟」——唔知佢啲妹有冇佢咁靚呢？

IG：mm_runa