Photos: Tomytec

有儲開車仔，又自問種類夠廣兼平貴都買嘅巴打，可能都有留意近兩年日本TOMY嘅TOMYTEC TLV系列愈造愈好。

所謂愈造愈好，當然唔係手工靚到好似千幾蚊嘅貨色咁得手啦，係廠方幾肯發掘一啲車迷鍾意，但巿面唔多，又或者係喺車壇洪流轉瞬即逝嘅特別版本。TLV，全名係Tomica Limited Vintage NEO，有買就趁平買，遲買又要捱炒價。

廠方最近公布，將會喺九月推出1:64版萬事得787B。終於燒到呢筆嘞，今年係萬事得轉子引擎（Rotary Engine）汽車商品化50周年，好多fans都預咗畀人斬一筆。

就咁睇目前由廠方發放嘅圖片，呢部787B嘅油漆都幾均勻，望落算滑溜，車花仔細。車體前半部份同引擎艙蓋可以掀起，引擎艙真實程度……勉強過得去啦，引擎、散熱器、油液壼都齊。

廠方話目前正向萬事得廠方，以及787B當年最大贊助商——成衣品牌RENOWN申請版權及商品化，Tomy攞License又點會唔得？準備俾錢啦！