Photos: Toyota Australia/Toyota Europe

據了解，豐田（Toyota）喺過去大半年，就下一代Corolla同下一代Yaris嘅命名方法有咗深入研究，因為兩款車都係豐田嘅大熱基礎型號，喺全球多個地區都有發售。按照社史，呢類車有啲會以同一個車名發售，有啲會因應個別地區、文化或語文（尤其讀音），採用專供相應地區嘅車名。

據知，下一代Corolla掀背車型嘅日本版，將會繼續採用Auris一名，一講Auris，香港用家可能有啲印象，幾年前曾有英國製造嘅Auris掀背車輸港，嗰款車嘅輸港版本配1.8公升直四混合動力系統，即與Prius同款引擎、摩打及波箱。

至於，下一代Yaris（有望2020年前推出），其日本版將唔再冠以Vitz，Vitz喺1999年發表，輸港版稱為Echo，當中又有Echo Verso，當時部分亞太同北美版本，都係採用Echo一名。Yaris一名主要應用於歐洲巿場，有長年研究豐田車系命名方法嘅日本行家認為，廠方唔再喺日本版起用「Vitz」，擺明決心將呢款豐田compact car定位為「歐洲味小車」。

另外，有消息指下一代Yaris將有一副全新引入嘅1.5公升Turbo引擎，呢款機器建基自既有嘅2公升直四設計，但就會刪走一個汽缸，聞說最大馬力將不少於120匹，峰值扭力不少於15kgm。熟實嘅話，豐田喺入門級動力系統方面又添一員猛將。