Photo: Honda Japan

混合動力（Hybrid）車、電動車愈趨普及，汽車工業界亦愈來愈依賴稀土，因為呢類汽車都會有摩打，而摩打中嘅磁石為咗要有高耐熱同高磁力，多數會加入稀土中嘅兩種重稀土，分別係鋱（音：剔，Terbium，Tb）及鏑（音：的，Dysprosium，Dy）。

本田與大同電子聯手研發嘅非重稀土磁石

不過，自2011年開始，身為全球最大稀土輸出國嘅中國，減少對外輸出稀土，變相增加咗汽車製造商嘅Hybrid車製造成本，亦令唔少車廠憂慮重稀土喺日後能否穩定供應。日本大同鋼鐵（Daito Steel）屬下嘅大同電子，自2012年同日本TDK就減省依賴稀土及尋找替代方法展開研究。 

今日（7月12日）本田（Honda）宣布同大同電子，推出全球首部採用非重稀土摩打嘅Hybrid車，亦即係預定喺今年秋季嘅日本發售嘅facelift版Freed Hybrid。

將於今年秋季喺日本發售嘅Honda facelift版Freed

Freed Hybrid嘅摩打，採用含有輕稀土釹（音：女，Neodymium，Nd）嘅磁石，釹本來及唔上鋱同鏑，但大同電子透過納米技術，令結晶粒嘅排列更緊密，另外，亦改變磁石嘅形狀及轉子/定子嘅設計，從而提高釹質磁石嘅耐熱度、扭力、馬力，令佢嘅整體表現同含有重稀土（上文提及嘅鋱及鏑）嘅磁石表現看齊。

一句到尾：而家有新技術，可以睇少啲「強國」面色啦！

圖為Freed Hybrid摩打嘅轉子/定子

轉子/定子外圍設有磁石存放區域