Photos: Newspress UK/Bosch Germany

凌志（Lexus）早前公布，將於一月舉行嘅北美國際車展，發表新一代旗艦LS。

圖為新LS雛型LF-FC概念車，2015年東京車展發表

據日本傳媒報道，新一代LS將會率先配備「無側鏡」技術，靠近兩側A柱位置設有視像微型鏡頭，取代傳統實體門邊鏡。不過，為配合各個國家及地區嘅法例，「無側鏡」只屬買家選項，凌志仍會生產「有側鏡」嘅LS。

另外，即將推出「無側鏡」技術產品嘅德國博世（Bosch）將會喺一月CES公布其「無側鏡」概念車，到時再update你。

引擎方面，「3.5公升V6 Turbo」之說可謂十拿九穩，只待廠方揭盅。值得留意係，有說凌志銳意深化高性能系列（如F SPORT）嘅發展，將於LS發表後18個月內，加推LS F SPORT，傳聞最大馬力約為420匹，峰值扭力約60kgm，配來自愛知（Aisin ）嘅10前速自動波箱。

老問題：平治S-Class、寶馬7系、奧迪A8、凌志新LS，你點揀？