「很想要求你會三更半夜陪著我……」呢句歌詞真係道出好多女性心聲。除非你有個任性港女女朋友，要你on call36小時。如果唔係，一個好嘅女朋友，都會處處為男友著想，例如會考慮對方成日陪自己，會唔會冇私人時間？會唔會太攰？會唔會少左陪兄弟？所以有時就算想男友陪自己，都會笑一笑，講句︰「唔使啦，我自己得架喇！」但實情係，呢一刻，佢其實好想你留喺佢身邊。

更堅強獨立嘅女朋友都好，點都係一個女仔丫。女仔就係要人保護、照顧。平日點硬淨，總有啲Moment，佢會好想你可以陪住佢。人生咁多時刻，邊一刻佢會感到好需要你呢？問佢佢就唔會講架喇，睇埋下文你咪知囉～

唔舒服要去睇醫生嘅時候
病咗個人就最脆弱，最需要人照顧。呢個時候唔依靠男朋友，仲可以依靠邊個呢？

想啪啪啪嘅時候
女仔都會有性慾，不過好多時不同於男生，女仔覺得性同愛唔可以分開。所以想啪啪啪嘅時候，自然會特別掛住男朋友。

夜媽媽自己喺條街嘅時候
雖然香港治安算好，而且夜媽媽都燈火通明，又好多人。不過女仔一個人半夜仲喺條街，始終好危險，會想有男友保護自己陪住自己。

出國回來嘅時候
出國冇見男朋友一排，當然希望第一個見到嘅，係自己最愛嘅人。如果男朋友仲可以好貼心咁接自己，幫自己拎行李，真係溫馨到爆炸！

半夜被惡夢嚇醒嘅時候
有時半夜發惡夢嚇醒，個心會覺得好驚慌好不安，呢個時候，最需要男友安撫自己，穩定自己情緒。

M到嘅時候
M到嘅時候，女仔唔只會有生理上嘅痛楚，心理上都會有啲轉變，變得特別情緒化，容易抑鬱、煩躁。就算呢個時候嘅女朋友幾難頂都好，佢都會希望男友陪住，因為M到真係好辛苦架！

水樽蓋扭唔開嘅時候
話晒係女仔，力量都有限，有時需要做啲靠氣力嘅事，自己做唔嚟，自然諗起大大力又可靠嘅男朋友。