唔係個個聽到女朋友一句︰「今個月未到……」都會欣喜若狂，為自己即將成為爸爸而感到興奮。如果你自問未想聽到呢句說話，就真係要做足安全措施。可惜目前世界上未有100%成功避孕方法，就算係最絕嘅結紮，都仲有0.1%-0.2%意外懷孕機會率。你話如果有個開關掣可以控制精子流動，簡簡單單啪一啪個掣，啲精子出出入入都盡在掌握之中，咁就真係Perfect池！喂！今鋪唔係真係i have a dream架！有人真係整咗呢個精子開關裝置出嚟呀！

德國有個叫Clemens Bimek嘅木匠，睇完一部有關避孕嘅紀錄片之後，就開始為絕對避孕作出構思，諗住如果可以喺人嘅體內植入一個精子開關裝置，控制精液流動，可能就可以達到完美嘅避孕效果。於是佢就開始研發，終於喺2016年完成「精子開關裝置概念機」！