千奇百趣嘅事何其多，不過似乎喺日本就特別多喇！喜歡日本文化嘅巴打都知，基於歷史關係，神道教同佛教都係日本嘅主要宗教，所以日本寧舍多神社同寺廟等等，而且供奉之神仲好多元化，例如「航空神社」會供奉飛機、「雙手神社」會供奉手……

而早前就有日本網民發現一個極詭異嘅寺廟，仲稱佢為「最狂廢墟」！點解叫佢做「廢墟」？因為呢個寺廟已經荒廢多年……但最離奇嘅係，仲會有人悄悄地去打理呢間寺廟，喺寺廟入面掛晒胸圍……兼且定期更換……所以又稱為「內衣寺」，你話詭異唔詭異先……？

呢個傳聞中嘅「內衣寺」係位於茨城縣北部嘅山上，由於好耐冇人嚟參拜，周圍都生晒雜草，而且裡面極度殘舊，非常混亂。