舊年海洋公園都有舉辦過夜間美酒佳餚盛薈，今年就有「歌酒節2018」，規模更盛大，有街頭美食攤檔，又有過百款酒品，包括國際大獎啤酒、本地研發的新口味手工啤，以及會場限定飲品，園內重搞埋mini concert，以為好貴？入場費最低只係$50，仲可以用嚟消費，平心而論的確係抵，不過你唔好諗住入到去仲有機動遊戲可以玩啦...

我抱住去「飲」去食嘅心態進場，先講飲，啤酒為主要，比利時、美國、日本常陸野啤都可以飲到，當中亦有香港本土HEROES BEER CO.岀品的美式小麥啤酒「Hangry Donut Hopiscus Wheat」，清爽易入喉。

 而台灣過江龍掌門精釀啤酒亦製作會場限定「粉紅CHILL人」飲品，用蜂蜜啤酒、紅莓汁和伏特加調咗杯啤酒雞尾酒，啱晒女伴飲。

場內仲有多間街頭美食攤檔，當中包括藝人蕭正楠打造的美式珍寶級漢堡「BURGER B」、傅珮嘉主理「三星廚房 TRISTAR KITCHEN」所烹調的正宗台式牛肉麵及蕭潤邦Oscar所創立的「正宗上海生煎皇」仲有多間美食小檔，總體感覺有少少似德國啤酒節。

當然如果你唔想同人迫，園內海龍王餐廳都有個限時供應的春季菜單，六道菜的嚐味菜單$688/每位，飲埋酒就再加$300(另收加一服務費)，中式粵菜與西式餐酒的配搭。

若果你係為音樂進場，票價都唔貴，$180或$280，視乎你係搵周國賢、盧巧音、林二汶、觸執毛等等歌手組合啦，如果我住港島南，以呢個價錢我會入場....之不過我住新界，無緣了。

歌酒節2018
日期：3月10日至4月2日期間連續四個周末和復活節假期
時間：6:00pm - 11:00pm