好記得上年尾上海Starbucks Reserve Roastery開幕，面積比美國西雅圖的首間咖啡烘焙工坊仲要 大，樓高兩層，佔地足足 27,000 呎，由烘焙咖啡生豆開始，由睇住Barista席前示範用虹吸壺沖煮咖啡，又或者飲埋咖啡啤酒同調酒，成件事成間店chic到一個點，仲成為亞洲區旅遊熱點。

相信香港Starbucks迷一路都牙癢癢，不過唔使妒忌，今日終於等到香港開，Starbucks首間旗艦店登陸銅鑼灣。作為首間Starbucks 旗艦店，咖啡和飲品的新增內容究竟有咩重點？

特濃咖啡馬天尼 $85

俾Advanced 咖啡飲家嘅Starbucks Reserve™，繼續有Nitro Cold Brew、Siphon、Pour Over、Coffee Press 等等唔同方法製作的咖啡，不過夏天就特登加入雪糕嘅單品，好似冷萃雪糕咖啡及氮氣冷萃雪糕咖啡，夏天啱飲。而繼IFC 分店賣酒的成功，Mixology Bar繼續有酒飲，紅酒白酒加埋咖啡Infused啤酒，新增啤酒酒款是 Sparkling Kenya IPA，不過好似我地MenClub咁出眾嘅男人，識飲一定飲Martini，而旗艦店Mixology Bar就有咖啡大師現場調製特濃咖啡馬天尼Espresso Martini，咖啡味重過酒味，好易入口。

冷萃雪糕咖啡 $56

麥香雪漾冷萃咖啡 $69

Starbucks® Teavana Bar 亦是全港首設，不過內容就傾向女生共賞，15款旗艦店限定的茶飲，包括5款香港獨家創作，以新鮮水果再配搭英式紅茶、洛神花茶、薄荷香檸綠茶以及全新白茶等茶底。另外仲有鮮奶泡沫茶飲系列，相信睇準坊間對奶泡茶的需求，（又或是背後同集團飲品店「茶狼Cha Long」的成功？）

鮮果茶園 $58 (473 mL)

我個人認為成間店最抵飲個位就屬於Teavana Bar，客人可選虹吸方式煮茶，慢慢欣賞香茶沖泡過程，OK，叫杯壺茶都係$60蚊，齋沖都10分鐘，飲我估你都要你30分鐘以上（韓式小鮮肉外型的咖啡師意外深得同行行家歡心，well ）。

飲品項目多，而食物方面，除咗本身都有供應的沙律輕食外，旗艦店供應三款All day breakfast餐點，仲有三款下午茶供應嘅鬆餅，講到明美式，非日式入口一陣風嘅食感。

最後想remark 一件事，就係呢間分店雖然只佔地5,500呎，不過小巧齊全，況且應該是香港眾多Starbucks分店中最闊落的一間，座位相隔有距離，隔離枱講嘢都比較難聽到，睇住銅鑼灣鬧市路景，意外帶點外國旅行嘅感覺，絕對無負「旗艦店」之名。

（按：同事回報，星期日爆場爆到......完全大巴大巴星咗我一下。）

香港星巴克旗艦店
地址：銅鑼灣新寧道1號利園三期1樓101-110號舖
營業時間： 7:30am – 11:00pm（星期一至星期五）；8:00am – 11:00pm（星期六、星期日及公眾假期）