【識食百科】意大利粉到底有幾多種？

文：MenClub William 圖：互聯網
POSTED ON 18 Jan 2017

香港人相當啱食意粉，邊個無食過？更將意大利粉呢個食材，成功無縫融合到港式飲食文化裡面，你見澳牛嘅常餐賣嘅嘅叉燒通粉、茶記好難見到嘅「燴意粉」、19萬間cafe都有供應嘅小碟pasta，係咪唔講唔覺？

不過意大利粉到底有幾多款？除咗平時常見嘅闊條麵、天使麵、字母粉、螺絲粉，其他仲多到你唔信，雖然可能比較少機會食到，今次就係咁易列舉下，認下都好！

意大利粉主要分為兩大類，一長，一短，其他仲有絲帶、塊狀、粒狀等幾類。而長意粉亦有分類，會用數字代表粗幼度，通常為0至16度，數字愈細愈幼，常見嘅幼度係4至5號，即使唔同廠都大同小異。

長意粉
意大利粉 Spaghetti 意大利粉，你叫慣Pasta定係Spaghetti？Pasta就係意大利粉嘅統稱，而Spaghetti就係最classic嗰款長意粉，出現率最高，醬汁配搭亦多，無論卡邦尼定肉醬意粉都係大路嘢。扁意粉 Linguine 扁意粉比意大利粉闊身，橫切面呈橢圓形，約4mm闊，通常用黎炒。闊條麵 Fettuccine 外形似絲帶，有厚度，亦較掛汁，配濃味嘢多。天使麵 Capelli D'Angelo (Angel Hair) 故名思義，天使嘅頭髮，最幼嘅意粉，幼度嘅數字去到0或1。

短意粉
長通粉 Penne 一條細水管，帶坑紋，最常見都係焗，香港有9成9嘅Penne都係配吞拿魚...唔知點解。通心粉 Macaroni 港人認識最深，彎曲嘅管狀，表面有無坑紋，早餐常餐都一樣見到。貝殼粉 Conchiglioni 細細粒，真係成個貝殼咁，個兜都裝到少少醬汁，所以放湯就最好。



source: Pasta, Food Infographics, Italian Cuisine