【奪冠之後】勇士來季陣容薪酬分析

文：MenClub Mr.波特　　圖：互聯網
POSTED ON 15 Jun 2017


今年NBA總決賽喺第五戰勇士主場擊敗騎士後正式落幕，勇士以總局數4：1擊敗騎士，喺三年內第二次奪得NBA總冠軍，而其中新核心Kevin Durant更加係首次奪冠，一完自己嘅總冠軍夢。不過就喺勇士奪冠後，亦代表住各支球隊要為新一季嘅NBA作準備，就算係成為衛冕冠軍嘅勇士亦必須作出陣容上嘅調整。勇士陣容強大已經係不爭嘅事實，雖然核心陣容理論上唔會變，但係佢地亦無可避免需要對後備陣容作唔少嘅變動，以下將會就勇士嘅薪酬情況作出預測及分析。

喺勇士目前嘅陣容入面，有6位球員來季同球隊有合約在身，其中包括三位核心Kevin Durant、Klay Thompson以及Draymond Green，新秀Damian Jones及Patrick McCaw，仲有二年生Kevon Looney。睇番佢地6位嘅合同，以下係佢地來季嘅年薪情況： Durant：$27,734,405 Thompson：$17,826,150 Green：＄16,400,000 Jones：$1,224,240 Looney：$1,192,080 McCaw：$905,249

值得一提嘅係，KD嘅合同為球員選項，以目前聯盟嘅情況佢一定會選擇跳出合同，唔係話佢要離開勇士，但係佢一定會尋求一份更大嘅合同，尋至係一份頂薪合同。除左KD會要求一份頂薪合同外，勇士另一招牌球星Stephen Curry亦都絕對會要求一份頂薪合同與勇士續約的，而呢份頂薪合同預計將會達到5年2.074億美元，這代表其年薪將超過4000萬美元。

不過勇士要想同時留住KD同Curry，根本係一個接近不可能嘅任務。首先，勇士留住Curry係必然架啦，佢地一定會選擇同Curry續約，咁加入左Curry嘅4000萬年薪後，加上以上5位已經有合同嘅球員(KD會跳出合同)，勇士來季嘅薪酬支出已經達到7700多萬美元，但來季NBA球隊嘅工資帽「只有」1.01億美元，而奢侈稅界線就係1.15億美元左右，所以如果勇士唔想過奢侈稅界線，基本上佢地嘅薪酬空間只係剩番3800萬美元。

當然，勇士隊絕對可以選擇繳交奢侈稅，咁樣嘅話即使續約KD亦都唔成問題。不過當加入相信年薪至少3000萬美元嘅KD後，勇士就咁計呢7位球員嘅總薪酬開支已經達到1.07億美元，超過左工資帽600萬美元。

再睇下勇士目前嘅陣容，Andre Iguodala同Shaun Livingston都係球隊嘅主要輪換球員，所以一定會想同佢地續約，而球員亦都會想續約留喺勇士。不過，以目前聯盟嘅薪酬情況，「小AI」年薪應該都要達到1000萬美元，而Livingiston至少也要維持現在大慨的600萬美元。加埋呢兩位主要後備，勇士嘅總薪酬就會增加至1.23億美元。

1.23億美元嘅薪酬支出就只有9位球員，與正常至少15位球員黎計，勇士仲要簽多至少6位球員。而睇番目前勇士剩番嘅球員，預計Zaza Pachulia、David West同埋JaVale McGee都必定會離隊，其中前兩者已經成功獲得總冠軍，所以今年夏天必定會尋求一份價錢正常番啲嘅合同，而McGee就更加向所有人證明左自己已經唔再喺以往個個腦殘球員，所以相信佢要搵一份年薪千萬嘅合同亦唔難。

雖然未知勇士喺今年夏天可以搵到邊啲球員補強，但係相信亦應該有唔少具經驗嘅老將會為左奪得總冠軍而加入勇士，參考番Zaza同West程度今年嘅年薪，佢地平均都要150萬美元，咁樣勇士加番兩位接近Zaza同West嘅球員後，就達到11人，但總薪酬支出就會達到1.26億美元，而呢個數字同今年騎士嘅總薪酬支出相當接近。不過記住呢個係講緊勇士仲未簽夠人架。

如果勇士真係要簽夠15人，咁以今年陣容黎做參考，佢地要簽多4個平均年薪達100萬美元嘅球員，但係當然佢地可以選擇簽啲年薪更低嘅球員，但係保守估計4個球員加起黎都要300萬美元。咁樣勇士嘅總薪酬支出將會黎到1.29億美元。如果勇士咁樣就停止增兵，佢地將會超出奢侈稅界線1400萬美元，咁樣勇士將需要繳交3500萬美元嘅奢侈稅。

對於岩岩奪冠嘅勇士黎講，如果佢地想尋求衛冕睇黎都應該好難避免繳交咁高昂嘅稅款。不過值得一提嘅係，如果佢地不幸咁超出奢侈稅達到1500-1999萬美元，佢地要繳交嘅稅款將會進一步倍增，以超過奢侈稅界線1500萬美元來計算，勇士將需要變交多達4875萬美元嘅稅款，呢個絕對唔係一筆小數目。

睇到以上嘅小分析，可以見到勇士喺今年夏天對陣容嘅調整絕對唔容易，作為球隊主教練嘅Steve Kerr要衡量球隊實力以及稅款嘅比例，稍有咩差池嘅話，佢地可能就只能夠保留強大嘅正選陣容，而後備嘅板櫈深度可能就要犧牲了。所以話，就算今年勇士幾咁強大都好，來季其他球隊都係有機會的，因為下一年嘅勇士已經唔會再同今年奪冠嘅勇士一樣了。