- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
如果要數今季NBA最成功嘅球隊，你可能會覺得係勇士，因為佢地成功得到Kevin Durant這巨星加盟，喺季後賽佢地亦以壓倒性嘅實力再次奪得總冠軍，所以今季最成功嘅球隊絕對非勇士莫屬。不過，如果計埋球隊未來嘅話，有另一支球隊可能就比勇士更成功，佢地就係今年嘅東岸冠軍塞爾特人啦。 | |
| 塞軍雖然喺今年季後賽被騎士以4：1淘汰出局無緣總決賽，但係望番佢地目前嘅陣容、薪酬空間以至選秀權，我Mr.波特可以大膽講句佢地絕對係NBA最有未來嘅球隊。 | |
| |
| 首先，塞軍今年成功壓倒騎士成為常規賽嘅東岸一哥，球隊核心陣容除左Al Horford 31歲之外，其他主要球員都細過30歲，所以算係一支非常年輕嘅球隊。而佢地嘅球員薪酬亦都非常良好，除左Horford下季年薪達2700萬美元外，其他已有合同在身嘅球員無人年薪超過1000萬美元，喺現今NBA嘅市場入面呢個情況絕對係非常罕見的，因為即使係普通球員宜家都可以輕鬆取得過千萬美元嘅年薪。 | |
| 建基於良好嘅陣容結構，今年嘅塞爾特人憑住黎自籃網嘅選秀權，成功獲得今年夏天NBA選秀大會嘅狀元簽，要知道今年嘅選秀大會被譽為十年一見嘅選秀大年，一班極具天賦嘅新人即將進入NBA，而塞軍就擁有獲得當中潛力最高嘅球員，東岸冠軍可以選狀元，咁嘅情況絕對可以被認為係犯規一樣。喺現有嘅陣容上加入一位選秀狀元，塞軍嘅實力絕對會更上一層樓，不過呢個都未係塞軍今夏嘅目標，佢地組軍嘅目標絕對唔係講笑！ | |
| |
| 首先，2017-18球季塞軍嘅總薪酬支出目前大慨只有7000萬美元，這已經包括一眾核心，好似Horford、Isaiah Thomas、Avery Bradley等，而來季NBA嘅工資帽為1.01億美元，奢侈稅界線為1.15億美元，所以即使塞軍唔想觸發奢侈稅，佢地都足足仲有4500萬美元嘅薪酬空間去增兵，4500萬美元已經可以簽下市場上任何一位大牌球員。 | |
| 目前黎講，塞軍對爵士明星球員Gordon Hayward有好大興趣，基本上佢可以被認為係塞軍今夏增兵嘅第一目標，佢嘅到黎將會令塞軍喺小前鋒上嘅攻力大增，而塞軍教練Brad Stevens又係Hayward大學時期嘅教練，兩人嘅關係亦都係增加後者加盟塞軍嘅可能性，咁樣單係Thomas+Hayward+Horford+狀元呢個組合已經J死唔少人。 | |
| |
| 不過，加入Hayward都未完呀，塞軍同時亦對快艇大前鋒Blake Griffin有興趣。快艇今夏面臨星散嘅境地，Chris Paul、Griffin、J.J. Redick等人都相繼跳出合同，其中CP3同馬刺眉來眼去，而塞軍亦會追逐Griffin。當然，塞軍無話一定要同時簽下Hayward同Griffin，佢地嘅目標都係希望簽到其中一個，不過有陣時啲野話唔埋，話唔定最終塞軍可以同時簽晒佢兩個番黎，係就太恐佈啦，因為到時佢地就係組成：Thomas+Bradley+Hayward+Griffin+Horford嘅正選五虎，諗下都以為自己打緊機。 | |
| |
| 除左喺自由球員市場出手外，塞軍亦可以選擇同其他球隊進行交易，其中公牛嘅Jimmy Butler都喺佢地嘅目標之一，雖然Butler係公牛嘅核心，但係佢並唔係非賣品，所以只要有合適嘅報價，公牛係絕對有機會交易Butler的。最大嘅可能性係，塞軍利用狀元簽再加部份其他角色球員去同公牛交易，咁樣真係可能令公牛心動，因為佢地將可以利用呢位狀元去作為基隊核心重建球隊。 | |
| 除左Butler，溜馬嘅Paul George亦都係塞軍可以選擇與之進行交易嘅選擇，呢位球星已經無意繼續留喺溜馬，所以球隊必定心急將佢交易掉，以免人才兩失，咁樣塞軍絕對係最有本錢去同佢地交易嘅球隊之一。 | |
| |
| 以現時嘅情況黎睇，塞軍今夏組軍嘅選擇其實有好多，就目前黎睇得到PG嘅機會可能係最大，因為球員本人已經無意留隊，再加上佢亦都想加入一支具競爭力嘅球隊，咁樣塞軍將會係佢一個唔錯嘅選擇。而Hayward留番喺爵士嘅機會相對較大，因為爵士實力上較強，而球隊亦會繼績以佢為核心。Griffin則可能要睇CP3嘅決定，如果CP3留隊，Griffin留隊嘅可能性亦相當較大，但係亦唔排除Griffin可能覺得留喺快艇無咩發展，轉投塞軍將可以獲得更好嘅待遇同機會。 | |
| 所以塞軍來季最終嘅陣容可能係Thomas+Bradley+George+Griffin+Horford，咁樣相信將可以進一步鞏固佢地東岸一哥嘅地位，同時亦都有本錢去擊敗騎士成為季後賽東岸冠軍。就算面對勇士，佢地亦絕對有可能與之抗衡。雖然塞軍仲未開始有實際行動，但係只係諗下佢地嘅可能性，都真係令人非常之咁期待啦！ | |
| |