【平行時空】若果當日「細哨」加盟的是曼聯而不是巴塞...

文：MenClub 波特先生　　圖：互聯網
POSTED ON 28 Mar 2018

現年38歲嘅「細哨」朗拿甸奴，喺今年年頭嘅時候已經透過經理人宣佈佢將會正式掛靴，雖然離開比賽，但呢位「快樂足球」嘅代表並唔會離開佢心愛嘅足球，預計佢將會出席唔同嘅足球活動，繼續為呢項運動作推廣。

而日前「細哨」接受媒體訪問時就說出當年一個秘密，原來佢由巴黎聖日耳前加盟巴塞前，其實差少少就加盟「紅魔鬼」曼聯。

2003年夏天，效力巴黎聖日耳門嘅「細哨」已經證明左自己嘅實力，之後加盟大球會只係時間問題。而據「細哨」透露，當年因為領隊費格遜同碧咸發生衝突，最終後者被迫離隊他投。而就係咁，費Sir就有意簽入「細哨」頂替碧咸嘅位置。

正當「細哨」同曼聯已經展開簽約談判，當時有機會成為巴塞主席嘅Sandro Rosell就向「細哨」表示:「如果我做到巴塞主席，你會來嗎？」「細哨」對此首肯。其後，Rosell即將贏得主席一職時，就即時打電話比「細哨」，而「細哨」好快就應承左，並向曼聯表示自己與Rosell有約在先。

「細哨」表示，唔少巴西人都傾向加盟巴塞，好似羅馬里奧、李華度、朗拿度等等，所以佢都好響往可以加盟巴塞隆拿呢支球隊。

就係咁，費Sir就咁失去左「細哨」呢位超級天才球星，而巴塞得到佢之後就創下一個短盛世，並之後由「細哨」成功傳承比美斯呢位目前世界最佳球員。不過正正因為失去左「細哨」，費Sir成功從士砵亭發掘到C朗拿度，將佢帶到奧脫福，其後佢亦成功成長為一位超級巨星。

如果當年「細哨」成功加盟曼聯，咁樣紅魔鬼可能會創造一個盛世，而同時無左「細哨」嘅傳承，美斯可能唔會成為今日嘅美斯，而C朗亦可能唔會加盟曼聯，咁樣佢就未必會走上巨星之路了。