設計對白：唔x係掛！

世界盃分組賽繼續進行最後一輪，今晚輪到非常受矚目嘅D組，其中克羅地亞已經出線，而另外三隊：尼日利亞、冰島及阿根廷就爭最後一個出線名額，三支球隊都有機會出線，究竟幸運之神會眷顧邊一隊呢？

最後一輪，阿根廷將會面對尼日利亞，而冰島則會面對克羅地亞，如果尼日利亞能夠擊敗阿根廷，咁出線嘅就係佢地，相反阿根廷就算贏波，都要睇埋另一邊冰島嘅賽果，因為如果冰島能夠擊敗克羅地亞，咁就要睇得失球啦。

不過面對咁緊張嘅關頭，已經坐定粒六嘅克羅地亞就宣佈將會喺面對冰島嘅比賽入面輪休八名主力，以此為主力們保留體力進行黎緊16強嘅賽事，其中會輪休嘅球員就包括：拉傑迪、文素基治、列比錫，另外有6名球員身負黃牌都會輪休，以免喺16強被禁賽。

克羅地亞主教練Dalic亦表示，佢地已經出線，所以唔會冒險去爭首名出線，作為球隊核心嘅摩歷及後防洛夫雲最後亦都可能會喺冰島嘅比賽中休戰。

對於克羅地亞呢個安排，相信阿根廷方面會非常不滿，因為咁樣冰島就有機會贏波，就算阿根廷最終真係獲勝都可能因此出唔到線。不過我諗大部份球迷都覺得阿根廷唔好諗咁多啦，真係贏到尼日利亞先算啦，對方亦都唔係容易被擊敗的球隊呢！