籃球比賽出現暴力行為並不罕見，但係爆發大規模打鬥嘅行為近年已經相當少見，但日前一場FIBA世界盃外圍賽：菲律賓vs澳洲，卻發生非常嚴重嘅球員打鬥事件，相信多位球員將會受到嚴重處罰，其中更包括部份NBA球員。

呢場菲律賓vs澳洲嘅賽事，雙方其實已經提前晉級下一輪，但係雙方球員卻打得非常有火藥味，甚至有唔少過火嘅身體碰撞。而就喺比賽打至第三節餘下4分鐘嘅時候，菲律賓球員Pogoy在突破入顏色地帶時，兩次出肘揮向澳洲球員Gliddon，其中第二次更將對方擊倒在地。

眼見隊友被Pogoy蓄意撞倒，喺旁邊嘅Kickert即刻為隊友報復，用左手肘擊回敬Pogoy，後者立刻應聲倒地。就係咁，雙方球員即時進入戰鬥模式大打出手，其中包括前NBA球員Blatche，而效力公鹿嘅Thon Maker亦都有份參與，甚至起腳踢對方球員。

其後雖然唔少工作人員都想阻止球員打鬥，但係卻阻止唔到雙方互相追打，其中籃底下嘅打鬥最為嚴重，亦都有見到菲律賓嘅球員拎起一張櫈車落澳洲球員頭部。最終，雙方激戰左分幾兩分鐘後終於成功分開雙方球員，有球員應該都真係被打到幾傷下。

pic.twitter.com/qFKRqpiYm7

— Kenjie (@KenjieZK) 2018年7月2日

經裁判睇番慢鏡重播後，菲律賓有9名球員被驅逐離場，而澳洲則有4名，因此最終菲律賓就只餘下3名球員能夠上陣比賽，由於唔想再打落去，菲律賓隨即讓3名球員5犯離場，從而結束比賽。

今次打鬥事件嘅規模可以話係近年罕見，最接近嘅一次相信就係2004年奧本山皇宮嘅球員球迷互毆，其中主角就包括「慈師傅」Metta World Peace。