睇佢個樣你就知佢係高級嘢黎啦係咪？況且佢仲話係畀太空人都可以戴所以特製嘅添！

但今次要介紹嘅唔係呢隻錶，而係以下呢個TIE戰機型音樂盒。

係，死忠們可能會覺得佢個設計係唔夠忠於原著－－兩邊太陽能板角度唔啱紋理亦唔對、中間駕駛艙唔夠圓、機身後面多咗兩粒上鍊位等等等等……但講真，見到佢呢個樣你真係會介意咩？

呢個名為「MusicMachine 3(MM3)」嘅TIE戰機音樂盒係由MB&F同有超過150年製作音樂盒經驗嘅「REUGE」合作，以MB&F嘅精細手工加上REUGE嘅經驗技術而成。兩邊機翼嘅中軸分別裝有一個金屬圓筒，每個圓筒之上以人手裝上超過1400個金屬突刺，以彈奏旁邊嘅72階音梳片。聲音透過機翼傳到以「350年機齡的共振雲杉(Resonance Spruce)加上Nomex峰巢結構物料」打造嘅地台再擴散開去。唔明呢？唔明咪就係高級囉！

咁講到尾佢都係個音樂盒，最重要嘅都係識彈歌出黎。擁有兩個金屬圓桶嘅總共可以播六首歌(嘅節錄)，當中包括右邊圓桶嘅《Star Wars》、《Mission Impossible》同《James Bond》主題曲；而及左邊圓桶嘅就係《The Godfather》、《Merry Christmas, Mr Lawrence(戰場上的快樂聖誕)》同70年代英國電視劇《The Persuaders》主題曲。

其實「MusicMachine」系列都唔係第一次出啦，03年嘅「MM1」係X Wing、上年出嘅「MM2」係《Star Trek》嘅Enterprice。