十月哈囉喂　山頂勁猛鬼

文：MenClub 魏文青　　圖：互聯網
POSTED ON 22 Aug 2014

暑假尾聲，學生哥又要準備返學，但亦都代表住一年一度嘅哈囉喂又就黎到啦，而家計劃定係時候架嘞！

過去幾年，如果你嫌兩大主題樂園的萬聖節活動又迫又唔夠驚，同女朋友去到似比人迫死多過嚇死，今年你就有個新選擇啦！因為號稱「世界最驚嚇」的美國著名鬼屋Fright Dome終於進駐本港！

Fright Dome由2003年起，每年九月下旬都將美國拉斯維加斯Cicus Circus酒店，約22萬平方呎的室內主題樂園，打造成世上最驚嚇的另類名勝。多年來獲獎無數，去年更吸引超過10萬人次入場。今年首次衝出美國嚟到香港，究竟有咩目標先？

圖中唯一正常人樣者就是Jason Egan

Fright Dome掌舵人，著名鬼屋主腦Jason Egan表示，睇中香港巿場除了因為港人愈來愈重視萬聖節，亦因為香港的鬼屋(冇錯，即係海洋公園同迪士尼)唔夠得人驚，佢話：「我很喜歡迪士尼，但他們針對的是一家大小，他們不會拎住電鋸追斬你；海洋公園過去幾年做得很好，我們會從演員方面著手，希望建立一個新標準。」

咁實際上究竟有咩分別？「屆時FRIGHT DOME將劃分為5個區域 – 兩個以德州電鋸殺人狂及小丑殺手為主題的鬼屋、兩個驚嚇區域及影相恐怖專區，演員與化妝將會很重要。」Fright Dome除了與炮製驅魔人(Exorcist)、奪命狂呼(Scream) 、猛鬼追魂(Hellraiser)、月光光心慌慌(Halloween)及追命傳說(Candyman)等驚悚電影的荷里活特技大師Gary J. Tunnicliffe合作，Jason的團隊也會設計各種「攞你命」的道具，場景角色以及陰深恐怖的仿真場景。

公關人員靜靜雞話我地知，如果你行得快，又行得哂，由你行入場區到出返嚟約需30-35分鐘，而部份地帶更刻意設計到只容一人通過⋯⋯咦？咁咪冇得比女女攬住囉！？

Jason向傳媒派晒定心丸，強調佢非常重視遊客體驗。「除了吸引更多人入場，我更希望他們玩得開心、安全，所以，我不會收你五、六百元入場費(票價由$199至$399)，整個活動舉行超過一個月(9月26日至11月2日，每日由3點到11點)每晚亦會設入場人數上限，我衷心希望可以有更多人接觸到Fright Dome。」

當日大會還找來名模Rosemary(後排右3)，有線怪談6魔女的(前排左起)許芯悅、吳堯堯(仙樂都)和Creamy Fu出席發佈會。

今次Fright Dome將大量聘用本地人才，主辦單位預計活動舉行期間可為本港創造約150個就業機會。演員要唔要好似之前有新聞報導咁講，著住件臭衫嚇人架？「我們有一隊同事專門負責清潔戲服，正如我所講，我希望所有東西都是安全衛生。」咁錫住伙記嘅老闆，梗係多人想跟佢搵食，難怪在公開招聘人手前，已有約20人毛遂自薦，希望加入Fright Dome團隊。

FRIGHT DOME 香港

開放日期	︰	2014年9月26日至11月2日
開放時間	︰	逢星期一至星期日，每日下午3時至晚上11 時 (最後入場時間為晚上10時)
地點	︰	香港山頂廣場，山頂道118號
入場票	︰	港幣$199 (星期一至五每日下午3時至晚上7 時，公眾假期除外)
		港幣$299 (星期一至五每日晚上7時至11 時；星期六、日及公眾假期全日)
特快入場証	︰	港幣$399 (適用於星期一至五每日晚上7時至11 時；星期六、日及公眾假期全日)