好快就到世界盃，只有世界盃，先可以令唔係睇開波嘅你都睇埋一份，亦只有世界盃，先可以令唔賭嘅你都賭埋一份。我哋不如先重溫返有邊幾套出名嘅足球電影，等我哋喺世盃之前，重拾足球狂熱！ 

(1)   【足球三部曲】一球成名 

唯一一部電影係以三部曲嘅形式講足球嘅，頭一兩集真係好熱血，講窮小子由一個小城哮喘仔，踢到成為英超球員明星，不過有人話第三集爛尾，第一集個主角喺第三集變咗大配角，冇得踢世界盃，跟仕成套都係講愛情。所以建議大家睇一二集，熱血完當睇晒就算，第二集有碧咸同一眾球星客串，過足癮架！  

(2)   【最溫馨】小喇嘛看世界盃 

兩個小喇嘛想喺村莊睇世界盃，唯有出盡辦法諗計仔，大家都想睇，但出力嘅又得啲細路仔，最後闖出小禍，大和尚同小和尚講：「你唔會係一個好嘅商人，但會係一個好嘅僧人。」係，好似同踢波冇咩關係，但套戲講到嗰種連和尚仔都對足球狂熱嘅氣氛，同埋其實個結局令人心頭暖暖，值得一睇。 

(3)   【球迷才懂的事】足球是我們的生命 

套戲講嘅嘢好簡單，就係講球迷對足球同球隊嘅愛。故事講一班球迷為咗幫一個球員攞返狀態，出盡法寶，嗰種真誠，學黃興桂話齋，真係有今生無來世，係球迷嘅睇完一定明！  

(4)   【球王比利x史泰龍】勝利大逃亡 

故事講二戰時德軍為打擊盟軍信心，搞咗場世紀屈機足球賽，搵班德國國家隊去同啲戰俘踢，於是戰俘們就奮力一戰，順便進行大逃亡。條橋幾有趣，又要踢波又要逃亡，加上套戲有比利同史泰龍睇，又有意義，各位讀者可以睇下！ 

(5)   【唔係唔講呢套下話】少林足球 

我知大部份人都睇過，而之所以我明知大部份睇過都要放出嚟，係因為我知如果我唔放，fb留言嘅朋友一定會講：「點解無《少林足球》！」呢套梗係經典，而且真係好勵志，人如果冇夢想，同條咸魚有咩分別？