中央圖書館斜對面嘅「文簿具社」近期成為網上熱話，皆因店舖老闆廿歲有找，而最有話題係，這位「小老闆 」竟膽敢在銅鑼灣貴租地段賣文具，成件事太非主流嘞，難怪傳媒爭相報導，一時話老闆係富二代、又話佢自小夢想開文具店，講到好似迪士尼童話故事咁。

原來，19歲的主角Jerry，既不是富二代，亦非自小想開文具店，更曾經諗過要「摺埋」文簿具社，佢嘅創業經歷，絕非網上所流版本般風光。

採訪當日，Mean娜一早到達舖頭等開門，於是致電Jerry，Jerry攰攰哋回應︰「等我15分鐘！」吖！又一個無時間觀念的90後。15分鐘就到，應該住舖頭附近啦？銅鑼灣區域，肯定係有錢仔。我有這種想法，好可能與我睇過多篇其他行家報道——「成功需父幹」、「有錢90後」，講完！

15分鐘後，「文簿具社」閘門半開，探頭去望，舖頭凌亂不堪，成地都係紙皮箱。咩事？！畀人打劫呀？Jerry睡眼惺忪向我講早晨，Mean娜不禁問︰「你係咪瞓過龍唔知醒呢？」Jerry話︰「尋晚返貨，執到天光都未執晒，唔好意思。」噢……係我唔好意思就真，姐姐錯怪了你。

真假富二代？

「睇過唔少媒體報導，話你18歲就開舖做老闆，係因為你係富二代，有屋企人照住，唔通真係『成功需父幹』？」

Jeryy坦言由家人打本，但自己絕非富二代，只是出身普通家庭。「至於筆錢係媽咪一路以來嘅積蓄」嘩！伯母真係錫到你呢！「因為媽咪一直好寵我，亦一直都好信我，所以，我18歲想開舖，佢好願意支持我。」哦～原來成功唔係需父幹，係需母幹。不過，Jerry算幾叻仔，儘管媽咪打本，但選址、採購、日常營運，都由Jerry獨挑大樑，為節省成本，Jerry更親自設計及裝修部份店舖。

學到嘢，憑著個「愛」字同「信」字，一樣可以創業。

夢想開文具店？

傳媒講Jerry勁Like文具，細細個就想開文具店，呢個口味都幾特別。

「其實，我除咗鍾意文具仲鍾意好多嘢，例如軍事物件、模型等等。至於夢想，細個只係想開一間店，咩店都得，總之就係想做老闆。」

點解唔係賣火箭炮模型、賣鋼盔，最後變咗賣原子筆同鉛筆刨？

「因為軍事用品，例如War Game嗰啲，香港已好多人做，模型又好難搵到特別嘅，同人鬥，競爭力。見香港無好似日本、台灣咁，有專門賣文具嘅店舖，於是想開番間。」

90後同求學中的00後，開舖頭，係要考慮市場因素，唔係話想開就開乜。聽完呢幾句，真係唔覺Jerry係「19歲仔」。

學生身分 vs 老闆身分

Jerry在大學讀中醫，要返學又要開舖，有冇搵屋企人幫手睇舖？「冇呀……我而家搞緊轉科，唔讀中醫，因為發覺不合自己。另外，屋企人要返工，幫唔到手，唯有有時走堂過嚟開舖，成日唔開，就賺少日錢。」

點解唔請人睇舖？

「始終係媽咪辛苦儲落嘅血汗錢，唔想有額外開支，食少餐都想慳啲使。」

咁你屋企人唔反對架咩？唔返學走嚟開舖喎？

「有傾過呢個問題，開頭有反對，但我覺得，如果我而家唔去試，將來就會冇勇氣同冇衝勁去做自己想做嘅嘢，所以我應承屋企人會平衡兩方面，而最後佢咃都信任我。」

開店實況

你間舖係就係好有特色，但老老竇竇，開店以來到而家生意點先？

「其實我開喺圖書館附近係希望多啲人會經過入嚟睇文具，但開店頭一段時間，幾乎日日都得個坐字，冇生意，當時真係好唔開心，諗過執咗間舖，但每次都同自己講，再堅持一下，希望有轉機，好彩有媒體報導過後，生意好轉，先打消咗執笠呢個念頭。」

但你啲產品咁另類，又唔係話貴，賺得幾多先？

「其實一開頭真係係咁蝕，但報導過後，而家都算係回返本。雖然啲文具係另類啲，但全部都好特別同好好用，我都係親自試過先入貨，啲人用過覺得好用就會買，所以就算產品另類暫時都唔成問題。」

適逢呢個時候，有人向Jerry推銷產品寄賣於店內，Jerry先得嗰19歲，又斯斯文文，會唔會畀人恰架？

「其實有時都會架……我又唔太識拒絕，不過我始終會揀啲適合舖頭嘅貨嚟賣。」點為之適合舖頭嘅貨？「我鍾意嘅貨。」Good！有性格。

石頭紙筆記簿

濕咗水都唔怕嘅紙

夜光墨水+玻璃筆

黑暗中會發光嘅墨水，同埋好似鋼筆咁要點墨水寫字嘅筆，但成枝用玻璃製成

黃鋼速繪鉛筆

得手掌咁大，一按鉛芯就會滑下來，質感好好而且寫落順滑。

MILAN擦膠

多角設計擦咩都咁就手

地址︰銅鑼灣摩頓臺灣景樓6A地舖
電話︰3565 6455
營業時間︰星期一至日13︰00 - 22︰00
網址︰https://www.facebook.com/journalize