如果你有去過西班牙嘅巴塞羅拿，就一定會去過當地地標「聖家堂」（Sagrada Família），而除咗建築本身嘅雄偉造型外，你亦一定留意佢竟然係仲起緊。事實上聖家堂早於1882年就開始動工，至今已超過140年都仲未完成，不過近日聖家堂官方公佈，教堂將依原定計劃於2026完成最高、最主要嘅最後一座尖塔「耶穌基督塔樓」，換言之近個半世紀之後，大家終於可以一窺呢座由著名建築師高第設計嘅教堂全貌。

圖片：聖家堂IG

聖家堂最早於馬德里建築師「Francisco de Paula del Villar y Lozano」領導下開始，但僅一年後佢就辭任，並改由加泰隆尼亞人、著名建築師高第（Antoni Gaudi）接手，並按自己嘅風格改變設計，成為目前大家見到嘅聖家堂。不過由於聖家堂——特別係著名嘅18座尖塔——工程浩大，但早期又只靠募資興建，所以速度非常緩慢，至1926年高第因車禍離世，先完成咗大約五份之一。

隨後西班牙爆發內戰，除進一步影響資金外，高第留下嘅建築模型亦有部份被破壞，於是整個項目一直到1954年先再次展開，並繼續依靠捐款及旅客入場作為資金。

進入近代後，受惠於科技發展，建築速度得以加快。2015年時，第四代負責人Jordi Fauli表示有望於高第離世100週年，即2026年時完成所有主要工程。早年疫情期間，聖家堂曾被逼停止所有施工及參觀，一度令外界猜測會令施工再次延期。不過近日聖家堂就表示，會按原定計劃於明年完成「聖母升天教堂」，而全高172.5公尺，將會成為世界最高教堂建築嘅「耶穌基督塔樓」則會於2026年完成。

資料來源：聖家堂