「藝術家會出現在他創作的每一本書的每一頁中，儘管他極力想從書中消除自己的影子。」——美國著名作家Henry James。

電影《點五步》講述讀Band 5中學嘅屋邨仔阿龍，加入校內棒球隊，經過多番挫折及磨練，最後成功擊敗日本球隊。而導演陳志發，恰恰都係一名屋邨仔，小學時更就讀區內最差小學，自言由細到大都畀人睇死︰「我以前絕對畀人睇死過好多次，由細到大，每個階段都有好多人覺得我唔得、冇可能、死梗……例如我入大學，好多人都意想不到；甚至《點五步》都係，好多人都睇死；我入呢行做都好多人睇死。」但結果呢個一直畀人睇死嘅屋邨仔，卻於大專組「首部劇情電影計劃」中勝出，佢嘅《點五步》更獲選為2016年第四十屆香港國際電影節參展電影之一，首映戲飛仲極速售罄，反應非常熱烈︰「我自己鍾意『做』畀人睇，而唔係『講』畀人睇，你畀人睇死唔緊要，把口生喺人哋到，言論自由吖嘛，最緊要你做到出嚟，做到畀佢睇，咁佢哋就冇聲出。」



唔知係咪受Henry James句說話影響，Mean娜覺得《點五步》處處都有陳志發嘅影子。27歲嘅陳志發，細個住屋邨，大個依然未離開屋邨，之所以有《點五步》嘅構思，一切源於想講一個關於屋邨仔遺憾嘅故事︰「當初其實喺我讀緊大學嘅時候，已經有一個屋邨仔青春遺憾嘅故事，嗰時《天與地》播緊，有音樂維繫佢哋幾兄弟，咁我發現我嘅故事差一樣嘢去維繫人物感情，如果夾硬寫出嚟就好鬼悶冇特別，於是我擺低一邊。直到過幾年喺報紙見到『沙燕橋』嘅新聞，知道原來背後有『沙燕隊』呢個故事，就靈機一觸，諗係咪可以將佢融入我嘅故事裡面，就有咗今日嘅《點五步》。」

陳志發嘅《點五步》想講屋邨仔遺憾，問到其實屋邨仔有咩遺憾？佢就有啲兜︰「屋邨仔嘅遺憾係……你喺成長嗰段期間物質一定冇咁豐富，例如以前有啲親戚中產或者有錢啲，一年去唔知幾多次旅行，又有得學好多音樂，總之學好多嘢睇好多嘢……我嗰時屋企連冷氣都冇添！（笑）咁呢個屋邨仔嗰段期間就會冇咁舒適，但而家睇返係開心嘅，不過有啲位真係比較艱辛。Overall都係開心嘅回憶，呢啲嘢可以話係對屋邨仔嘅鍛鍊囉，因為我覺得住屋邨係一定複雜過其他地方，特別以前嗰個年代，冇保安，冇掩雞籠就咁入去，轉落樓梯會見到人吸毒，或者打開防煙門會見到人哋收埋嘅水喉通……我覺得以前喺屋邨長大係一種鍛鍊，某程度上。」

Mean娜自己都係一個屋邨妹，的而且確，以前嘅屋邨環境係好雜，有飛仔四處流連，又會有黑社會劈友，但見得多，基本上都知扮冇嘢直行直過就冇事（除非你唔好彩畀人睇中）；而且住屋邨都有其他小朋友感受唔到嘅樂趣，就好似戲中一齊喺禾輋邨長大嘅阿龍同細威，成日喺走廊周圍跑周圍嗌，間唔中喺後樓梯搞吓事、上吓天台掟吓波，都係屋邨成長嘅獨有回憶。縱然喺屋邨長大幾Free幾過癮，但學阿龍話齋，屋邨仔最後都係要跳出屋邨先算成功。不過今時唔同往日，以前住屋邨，就想跳出屋邨，但而家有得住屋邨已經好好︰「八十年代香港所有嘢都發展得好好，啱啱爆緊起步階段，香港電影一年都開二、三百部啦，係而家每年嘅十倍，各行各業都好蓬勃。啲前輩都話嗰個年代只要你有心捱到就得，但問題係而家就算你有心有力捱到，都唔知要等幾耐，呢樣嘢係而家呢個年代嘅問題，所以都唔好話跳出屋邨，你跳入都難！（笑）」

老老竇竇，《點五步》嘅故事都幾熱血幾少年漫畫，係就係好睇，但又好易估到劇情。偏偏你明知跟住故事會點樣發展，都仲係會畀細眉細眼位感動到。可能正正係因為陳志發「畀人睇死」、「屋邨仔」、「對現今社會嘅無力感」等等成長因素，串成《點五步》中阿龍豐富嘅情感，以及對佢嘅盼望，所以一邊睇，你好易明白主角畀人笑、畀人睇唔起嘅心情，就好似一塊鏡，見到少少自己嘅影子。但其實唔只導演、你同我，相信仲有好多人睇到會覺得感慨，因為呢啲係小人物嘅共鳴，而香港實在太多小人物，所以大家都想爭一口氣，希望將生命嘅遺憾，投放喺自己嘅想像當中，賜予佢一個Happy Ending，而阿龍就完了大家一個夢。《點五步》劇情之所以咁正路，大概因為陳志發想勉勵大家，人哋覺得你冇用又如何，盡力做好自己就得︰「我想將電影帶畀而家一啲低落嘅人，好似上半年好多中學生自殺，我好想畀多啲年青人，或者正處於唔開心嘅人睇到，唔開心嘅時期，捱過去，捱過去就有希望。」去到呢啲爭氣位，就不期然有啲鼻酸，睇住阿龍撐住，就好似有個人辦你睇︰捱過去就有希望。

如果你睇咗《點五步》，應該會知其實呢句說話係來自粗口「x你老味」嘅近音，但「點五步」背後真正意思，係想講︰「棒球嘅半步半秒都會影響個大局，因為個波會好似子彈咁快，只要你一個唔留神差半步差半秒，你都會玩完。我覺得同人生同青春好似，你發生嘅嘢會影響你往後嘅事，好似『蝴蝶效應』咁，所以我想用『半步』、『半秒』懶係有型講青春嘩眾取寵，咩『一點五步』呀～Brain Brain下……喂！不如就『點五步』啦！好有四百擊嘅感覺！」

《點五步》就係想透過棒球，帶出所有嘢差半步都會影響一切，好似如果阿龍差半步跟阿威離開，佢就唔會擊敗日本球隊；如果阿龍差半步打咗個咸濕佬，可能佢就有機會同阿玲發展……如果，可能，如果，可能，通通都只差半步。生命中好多嘢都輪唔到我哋控制，電影中嘅阿龍朋友變咗、父親漸老、母親出軌……就算唔想成長變成大人，世界依然會繼續，唔會為我哋停止轉動，你我都非常明白。唯一可以做，就係掌握自己可以做嘅事，阿龍可以自己控制手嘅弧度、力度，投出一個個好球，就算之後被對手擊出嘅球打中，流血倒地，佢都可以自己控制，選擇死死地氣由得自己瞓低，定係靠意志起返身繼續投球。最後，佢選擇企起身。