【買衫玩「後數」？】UNIQLO同GU日本網店首推先買後付服務

文：MenClub Kay Pang 圖：互聯網
POSTED ON 12 Sep 2017

搭開小巴嘅人都應該會聽過「司機，後數！」呢句嘢，又或者幫襯開果間屋村茶仔都有得「後數」，但有冇諗過買衫都可以後數？本來以為只可以FF嘅嘢，估唔到已經喺日本率先實行！喺網上無論eBay又好定Online Store買嘢，通常都係用信用卡／PayPal即時畀錢，商戶收到錢就會出貨，但係UNIQLO同GU就決定打破呢個玩法，喺尋日（9月11日）正式喺日本官網，推出全新先買後付服務！

據UNIQLO日本官網稱，呢個全新嘅付款模式目的係令大家喺Online買嘢有全新體驗，而且亦可以縮短交貨同退貨嘅速度。大家只要喺APP上照平時落Order，當確認收到貨之後，就可以根據你要或者唔要嘅貨品，喺14日內去指定便利店、銀行同郵局付款就可以。講到呢度，相信大家最Concern會唔會好易出現「走數」情況？其實入手前需要先用地址同電話登記會員，要走數都唔係易事。究竟呢項服務香港會唔會有朝一日推行？咁就要睇日本果邊嘅反應喇！