【個人訂製服務】Armani「Made to Measure」2017秋冬廣告

文：MenClub Kay Pang 圖：互聯網
POSTED ON 11 Apr 2017

對於好似我一樣嘅80後嚟講，飲日本潮流奶水大嘅我哋，睇住近年韓風盛行o架風衰落嘅現象絕對唔好受，畢竟大家都知道日本人對於時裝嘅認真同堅持，單計造功同用料方面，追求花巧同快靚正嘅韓仔追多廿年都未必跟到（除咗遠征歐洲Hi-Fashion市場果幾個個別牌子例外）！但可惜過去呢十年日本出產嘅潮星每況月下，由木村年代有窪塚洋介、REVOLVER主腦ARATA、小田切讓、淺野忠信同中村獅童等等，到後期嘅瑛太、山下智久、「GATSBY藍星人」松田翔太同親身大佬松田龍平，再之後呢？好似得一個綾野剛！

不過最近，意大利奢華男士品牌Giorgio Armani嘅個人量身訂製服務「Made to Measure」，就邀請咗現年45歲，曾經喺90年代日劇《愛情白皮書》中飾演「松岡」一角而紅極一時，上年亦因為電影《鄰家怪嚇》重新被大家認識嘅西島秀俊，拍攝2017秋冬季嘅形象廣告。呢個「Made to Measure」服務最特別之處，係由揀布料、款式到商討剪裁同設計，都係由顧客自己去決定，之後再送去義大利嘅廠房製作，而款式除一般嘅西裝外，就連外套大褸甚至Tuxedo都提供客製服務，而今次揀中西島秀俊，相信除咗因為夠官仔骨骨，同時亦係睇中日本人對於西裝嘅重視吧！