早幾日Megabots就去咗北京參加G-Festival展覽，而同場仲有另一部機械人出現，當大家都以為係Megabots嘅秘密武器之時，其實呢隻稱為「大聖號」嘅機械人係由北京Great Metal鋼鐵意志團隊製作，更由中國著名機械人藝術家孫世前設計。講起孫世前，最出名就係曾經整過一部連河森正治都大讚嘅Valkyrie戰機，而今次佢設計嘅大聖號，係以齊天大聖作為設計藍本，聲稱呢隻大猩猩機械人能二足或四足移動，有多款近戰武器，將會挑戰機械人大戰！

美國Megabots亦已證實收到對方戰書，不過睇片覺得大聖號暫時只係擺設階段，機械人動作緩慢，而且成條官方片都係黑白，加上製作過程來來去去都係嗰幾個鏡頭，實戰係點真係令人懷疑，但唔排除係保留實力，話唔定識得爆炸呢？