為期3日嘅Google I/O大會今日正式展開，唔少人都預期通晒天嘅Android O會係重點，但其實「Google Assistant」先係成個大會嘅主打，將機器學習同人工智能結合出超強功能，應用已經超出想像！

由大會開始嘅片頭已經可以睇到，Google將會以人工智能發展為重點，一隻蛋陪住原始人一路進化成長，一齊玩一齊學習，甚至玩圍棋，用意係點大家真係一睇就明。順理成章，今年Google I/O除咗一早揚晒嘅Android O之外，以「Google Assistant」為核心嘅各種新功能同人工智能發展，都係今次大會嘅重點。

大玩圖像辨識 Google Lens
今次Google大會有唔少新功能都係同Google Assistant有關，好似圖像辨識系統咁，已經識得由影像分析出當中嘅keywords，亦能夠修復低像素圖片，甚至可以幫你執走圖片上嘅雜物。唔使搵PS大神，Google大神一個夠照，連改圖都撈埋。

能夠分辨出鏡頭影緊嘅主體係乜，如果你影花，更會分析埋係邊隻品種，唔再係「Flower」就算。又假如當你影住一堆Wi-Fi密碼，識得幫你將相片入面嘅字copy出嚟，一按就可connect埋，呢樣真超方便。如果喺街影住商店，更會出現詳細店鋪資料。將來Google Assistant同Google Photos都會加入呢個新功能。

Google Assistant 進軍iOS
上年大會重點之一嘅Google Assistant，仍然成為今年重點，以語音系統為基礎嘅Google Assistant，喺過去一年已經登陸超過1億部裝置，由智能家居到汽車系統都可以見到佢，幫你計時、報天氣、搵資料同開燈等工作都係同佢講聲就得，嚟緊連iOS都用到，到時唔知會唔會同Siri傾偈呢？

Google Assistant其實唔止語音系統咁簡單，以最近推出更新嘅「Google Allo」為例，就利用埋圖像辨識功能，能將你嘅selfie即時變成卡通sticker，而且可以產生563萬億個樣。陰謀論少少講，就好似大家一齊訓練Google Assistant成為最強人工智能咁。Google Assistant今年內會陸續增加支援語言，不過仍未支援廣東話，大家唔好諗住教佢講粗口。

Google Photos 回歸實體
現時每月活躍用戶超過5億人嘅Google Photos，除咗繼續有人臉辨識同埋自動分類，仲有有埋「Suggested Sharing」同「Shared libraries」分享功能，有少少似Google Drive玩法，可以開一個folder畀大家一齊send相上去，然後每收到新相都會有通知，聽落唔算好新奇。反而最後介紹嘅「Photo Books」有驚喜，事關估唔到佢竟然推出印實體相簿服務，最平由9.99美元起。

Android O 小改升級
去到大會後段終於講到Android O，不過新一代系統並冇特別強嘅功能出現，以優化為主。大會上強調新系統以「Fluid Experiences」同「Vital」為賣點，提升操作體驗兼加強續航力。首先提到就係畫中畫功能，將來可以邊睇片邊睇文字攻略打機，唔使再受全畫面限制，用盡multi task。

Android O另一改動就係改善copy and paste時選字嘅操作，以前你想選舉一段字你要長按之後再拉到合適位置，新嘅選字功能就識得自動認相關字，假設你想highlight地址，你只需要喺地址相關嘅字上面tap兩下，咁就可以幫你選舉晒成個地址，方便得多。對於續航力改善方面，Android O將會自動限制部份後台程式，同時右強開機速度，Google更以親生仔Pixel試過，用Android O系統開機速度比以前快成倍。Android O亦加入Google Play Protect，會時刻監視惡意app，保障系統安全。此外，大會上仲宣布Android O能支援Kotlin編寫語言，令開發者設計程式時有更好選擇。Android O嘅Preview版即日有得download，正式版推出日則未有公布。

其他重點仲有為發展中國家嘅入門手機而設嘅「Android Go」系統、YouTube嘅「Super Chat」新玩法等，仲有唔使連接手機嘅VR裝置，如果有興趣睇返成個LIVE，可以由37分鐘開始睇，大約兩個鐘睇完。