東芝（Toshiba）喺出售半導體業務一事上屢遇波折。 

最大一項阻力來自日本政府，因為東芝係日本半導體龍頭，政府擔心有關業務一旦賣到落入其他國家公司手上，將影響日本國家發展策略，以至最關心嘅國家安全問題。即係話，今次東芝賣嘢，賣畀邊個，一定要日本政府「OK」同「Like」先有運行。

月前由日本政府基金「產業革新機構」同美國基金「KKR」組成嘅「日美財團」，本來有望購入東芝半導體業務，但因為東芝負債嚴重，急需2兆日圓（即約180億美元），雙方就成交價拉鋸多時仍無結果。

近日，喺日方「產業革新機構」牽頭之下，搵來南韓半導體製造商SK hynix同美國基金貝恩資本（Bain Capital），組成「日美韓財團」。據日本傳媒報導，接近日本政府人士指當局滿意「日美韓」方案，而且三方畀到嘅金額亦達到東芝期望，預計好大機會傾掂數。