好多單身巴打都冇家中煮食習慣，總之茶記麥記吉記加兩間「大記」，搞掂晒，免煩。

講就係咁講，食得多「出面嘢」，真係想間中有餐精緻啲嘅住家嘢，尤其是曾經歎過出自「優質住家菜」嘅住家菜。 

其實，自問唔係雙臂殘廢或你個人hea到出汁，識得上網搵下食譜，唔難煮到好嘢食，當然，酌量投資落「架生」就少不免，所謂無氈無扇，神仙難變。

廢話講完，入喇！Panasonic喺8月初發表新款迴轉烤肉機（NB-RDX100），前半部係黑色圓筒機身，擺喺open kitchen係幾有型嘅。講實際，佢採用「雙火」佈局，意思係：喺回轉燒架軸芯旁邊，各設有高火及低火紅外線發熱管，睇過動漫《伙頭智多星》第一集「焗/炸豬扒飯」都知，但凡烤、炸肉類，最理想就係「雙火」夾擊，咁就可以做到鎖住肉汁，內層軟滑，外表又皮脆香口。

呢部機亦有燻製功能，高、低溫兩個模式，可以整燻蛋、燻三文魚、燻蠔等等。咁你淨係鍾意佢個樣，朝早撚幾件多士都得嘅。

55000日圓，合理之中又貴咗啲啲啲啦，11月喺日本發售。買返香港用，預咗要加隻大火數少少嘅「工業牛」。忍到手，不妨睇定啲，分分鍾來年有220V出口版。