正在喺上海舉行嘅首屆CES Asia，雖然被人話係山寨展覽，但事實上都展出咗唔少創新產品，好似呢款由Moley Robotics開發嘅廚房機械人更加全球首創，值得留意。

呢間來自倫敦嘅科技公司，製作咗兩條機械臂，而機械臂上配備咗20個摩打、24個關節同埋129個感應器，可以模仿到靈活嘅手部動作，更識得根據食譜資料庫內超過2000款菜式自動烹調，用家將來亦可以下載更多食譜。至於內置食譜就係由英國廚神Tim Anderson負責顧問，而機械臂更加記錄低Tim Anderson嘅烹飪動作同手勢，然後轉化為訊號等手臂識得跟據程序自動烹調。

Moley Robotics喺展覽入面，更加用廚房機械人即製crab bisque請入場人士食，Tim Anderson話呢味菜式對廚師係一個考驗，但呢款廚房機械人就可以輕易完成任務。廚房機械人暫定會喺2017年推出，而且正式版推出時更加會有埋自動洗碗功能，單係呢個功能已經係超偉大嘅發明啦。