月亮平時係白同淡黃色，點解無啦啦會變咗藍色呢？其實藍月亮唔係講個月亮變咗做藍色，而係一個月內有2次滿月，呢個多出嚟嘅滿月就稱為「藍月亮」。一般嚟講每個月只會出現1次滿月，而1年就會有12次滿月，但喺某啲年份就會出現1年13次滿月。

事關月亮圍繞地球公轉一次係29.5日，不過除咗2月之外每個月都有30或31天，結果月亮公轉少咗呢一、兩天累積耐咗，就會變成月頭同月底都有滿月嘅情況。今年7月嘅第一次滿月係7月2日，而今晚就會出現今個月內嘅第2次滿月，所以就會出現藍月亮呢個現象。

至於藍月亮呢個咁浪漫嘅名係點嚟，真正起源其實係美國緬因州嘅老農曆入面，以春分、夏至、秋分、冬至為季節分界，通常一季會有3個滿月，如果一季出現4個滿月的話，第3個滿月就會被稱為藍月亮。

上一次藍月亮係出現喺2012年8月31日，如果錯過咗今次就要等到2018年1月31日。今晚嘅月出時間大約係晚上6點50分，如果大家想睇到藍月亮就可以望向東南方，最好搵一個空曠地方就會望得比較清楚。此外，由於月球喺8月2日晚上6:03會進入近地點，月出時會因為「月亮錯覺」效應，令你睇到嘅藍月亮會比平常嘅滿月大。