美國猶他大學電機工程教授Carlos Mastrangelo同博士生Nazmul Hasan嘅研發團隊，最近喺期刊《Optics Express》上發表佢哋嘅最新研究，聲稱設計出一款利用液態鏡片造成嘅眼鏡，能夠自動對焦，戴咗之後睇乜都可以清清楚楚。

其實上個月嘅CES出現過，但當時唔係太多人留意到。講返呢一款眼鏡係咗一款特殊鏡片，鏡片用被透明膜包住嘅甘油造成，以模擬人類眼睛嘅晶狀體，喺鏡片嘅四周仲有3個用嚟改變鏡片折射率嘅驅動裝置，就好似我哋眼球嘅肌肉一樣，控制晶狀體嘅形狀以調節焦點。

Carlos Mastrangelo教授解釋眼鏡嘅鏡架有紅外線測距，能自動偵測物件同鏡片之間嘅距離，然後識得自動調節鏡片形狀令你睇得清楚。眼鏡仲可以連接到app，方便校準鏡片以適應唔同視力，實在係各位四眼仔同四眼妹嘅福音！目前原型版本比較笨重，但研究團隊已經積極輕量化。佢哋預計3年內可以將眼鏡量產，售價由500至1000美元不等。