今次介紹Huawei Mate 9嘅Porsche Design版，其實係上年底發表嘅手機，不過近日終於有正式售價同推出日，2月24日發售，售價達$11,888。尋日實機摸過上手，覺得髮絲紋機背嘅手感係幾舒服，曲面屏幕亦冇跣手。機身四邊都好簡潔，喇叭、micro USB-C同3.5mm位都喺晒機底。大家可能會問賣到過萬，到到貴在邊度？其實華為同Porsche Design足足花咗四年先傾好呢部手機，好多細節都感受到同Porsche Design嘅現代化工業設計風格。加上Porsche Design版算係市面頂級之列，每部都係限量發售，所以賣過萬亦唔誇張。

Porsche Design版Mate 9採用5.5" 2K雙曲面屏幕設計，屏幕邊緣同金屬機身做到無縫銜接，加上金屬髮絲紋處理，令機身感覺一體成形。Porche版仲有新一代 Kirin 960八核心處理器、6GB RAM+256GB ROM、2000萬像素黑白同1200萬像素彩色Leica雙鏡頭，核心規格真係好似跑車咁勁。

除咗Porsche Design版之外，仲有新推出嘅黑白版Mate 9($4,780)，即日起至3月31日，凡買機就送原價$298嘅b.DELICES Cher Lapin手機保護殼。至於有關P10同P10 Plus消息，已公布2月26日會喺MWC現身，預計會有藍、錄同金色等多隻顏色。P10將會配備5.5" 2K屏幕，繼續用返自家Kirin 965八核處理器、6GB RAM+128GB ROM、1200萬像素Leica雙鏡頭同800萬像素自拍鏡頭，有傳3月就會上市。