當你投入威士忌嘅世界，你會發現愈資深嘅飲家，通常會愈鐘意Independent Bottle (IB)。所謂 IB，中文直譯獨立裝瓶，即係有啲無酒廠嘅independent bottler由原蒸餾廠、其他銷售商購入原酒，再自行裝瓶，以自己嘅品牌賣返出去。IB大致分成兩類，一為Single Cask單桶原酒，從原蒸餾廠購入桶裝原液，再自己裝瓶；二係Blended，購入各種原酒之後，自己調和後裝瓶。而Carn Mor嘅Macallan 1989就係屬於前者，Single Cask系列。

IB Single Cask嘅酒標通常都會詳細列明呢枝酒嘅資料，以今次講嘅呢枝Carn Mor為例，酒標上可以見到幾項重要資料 : 蒸餾廠 Macallan、酒桶係Hogshead、號碼為6994，而蒸餾時間為1989年5月3號，裝瓶日期為2015年3月30，啲資料係可以詳細到呢個地步。你知得愈多，愈容易理解酒廠最原始嘅風格，從而與其他威士忌比較。

限量280枝，Cask Strength 42.5% ABV，官方品鑑話呢枝Sherry Cask Finished嘅Macallan散發出白蘭地、雲尼拿軟糖嘅香甜，仲有啲橙花花香，形成美嘅草本氣息。入口係清新嘅草本、柔和嘅香料味道，有啲薑味、白胡椒做點綴，甜味猶如蘋果同啤梨嘅香甜。收結悠長，帶有香料、大麥同草本味道。