{ SKIP }
文:MenClub Raphael  圖:互聯網
POSTED ON 19 Dec 2016

每一枝威士忌嘅酒標上,其實有好多實用資訊俾我地了解枝酒嘅風味;感謝上帝,蘇格蘭人無學日本清酒咁分一大堆學名同級數,而大多國家嘅威士忌,所列明嘅訊息都係大同小異。只要學識睇幾個詞語,各位巴打都可以輕鬆知道每一隻威士忌嘅內涵,咁當然,枝酒好唔好飲,要由你嘅味蕾去定奪啦。

Whisky 博大精深,入門一課,一定係學識點樣睇酒標,如果唔係點買酒返屋企試呢? 基本上喺酒標度,我地主要會見到以下呢堆嘢 : 酒廠 / 品牌名稱、橡木桶種類、年份、地區、威士忌種類、酒精度,樽身容量同裝瓶日期等等。如果係特別嘅作品,更加會列出 : 系列名稱、裝瓶廠 (Bottler)、品牌釀酒大師 (Master Distiller)、橡木桶編號,同埋非冷凝處理 (Non-chill filtered)、限量版等字眼。唔駛覺得頭暈住,而家MenClub同你一一拆解。

酒廠 / 品牌名稱。一枝酒通常最顯眼、最大個嘅就係Brand Name,例如大家好熟悉嘅蘇格蘭Macallan、台灣Kavalan;不過有啲品牌,個Brand Name同蒸餾廠個名係唔同嘅,例如調和威士忌、或者獨立裝瓶廠會喺不同蒸餾廠購買威士忌原液,所以不能畫上等號。

橡木桶種類。非常重要嘅訊息,對於威士忌嘅風味起咗決定性嘅影響。如果寫美國橡木桶 (American Oak) 或者前波本桶 (Ex-Bourbon Cask) 為主,你可以預料到威士忌會充滿雲尼拿、奶油、椰子等香甜味道,反之如果用雪莉桶 (Sherry Cask),酒液就會更重香辛氣息,仲有成熟果實嗰種甜味。去到PX桶、Port Cask、Madeira、Wine Cask都係玩特別橡木桶嘅作品,大家品嚐時可以留意一下。

年份。蘇格蘭作品,一定係用威士忌之中最年輕嘅成份做指標,例如99% 30年酒溝埋1%嘅12年酒,你都只能夠叫佢做12年。不過法例規定叫得做威士忌嘅,都只少有3年熟成時間,至於係咪高年份就一定好飲,就視乎巴打鐘意咩味道啦。

地區。單單講蘇格蘭,都要分Highland、Lowland、Speyside、Campbeltown、Islay等地方,因為隨著地理優勢、氣候分別,每個地方都有獨特風味,各勝擅場。例如我好鐘意飲嘅Islay Whisky,就以煙燻泥煤味著稱,出哂名重口味,一枝Octomore飲過以後真係返唔到轉頭架。

酒精度。成日講枝酒嘅Strength就係講緊酒精度 (ABV),叫得做威士忌嘅都只少係40%。呢個百份比係講緊喺20°C之下,酒液成份中乙醇 (Ethanol) 同水嘅比例;如果係40%,即係40%乙醇 V.S. 60%水,而美帝就鐘意叫Proof,純粹係將ABV乘2咁解啫,所以大家見到100 Proof嗰陣,唔好以為係100%酒精呀。

The Winchester Collection

系列名稱。如果枝威士忌屬於某系列嘅作品,如 The Winchester Collection,就顯示咗兩件事。一、呢個系列嘅幾款作品係有連貫性,二、鼓勵飲家一套過品嚐。通常Collection都有個主題,或者珍稀程度比較高,所以酒廠出系列作品,而呼籲大家儲齊一套,都算係營銷手法嘅一種。

裝瓶廠 (Bottler)近排好興玩嘅IB (Independent Bottler)就係上文所講嘅獨立裝瓶廠。事實上有啲酒商鐘意自己喺各個蒸餾廠買原液,跟住自己裝瓶出售,好多時IB會更著重於酒桶所帶嚟嘅原有風味,更會出售已經閉廠嘅原酒,珍稀程度超乎想像,所以甚得資深飲家追捧。

David Stewart

品牌釀酒大師。如果有個聲名顯赫嘅釀酒大師,基本上隻酒都唔會死錯人架啦。大家好熟悉嘅名字,包括Johnnie Walker嘅Master Blender Jim Beveridge、Glenlivet嘅Alan Winchester、Balvenie嘅David Stewart等等,個個都係威士忌業界翹楚,有佢地坐陣,已經係信心嘅保證啦。

Non-chill filtered講緊威士忌本身喺低溫下會變成Cloudy嘅狀態,而酒廠為咗保持酒液嘅澄澈,就會於最後做一個冷凝處理,去隔走呢啲物質。但又有一說呢啲物質其實都屬於威士忌嘅自然風味,為咗更加原汁原味俾大家飲到出桶狀態嘅酒,所以好多作品都開始玩Non-chill filtered,非冷凝處理。

Single Cask單桶。顧名思義,一個酒桶嘅威士忌作品,無玩過桶,亦無玩Marriage,同樣係追求原汁原味嘅代名詞。台灣Kavalan Solist 就係單桶原酒,酒標上面仲可以見到酒桶編號同埋酒樽嘅號碼。


呢次 MB&F 的 Horological Machine No.7「Aquapod」 腕錶,以深海水母為題,承傳地球上最古老生物的形態,並以複雜的機械鐘錶構造取得完美平衡,絕對是 100 分貼題的獨特作品! ... ...
watchesandwine
6億5千萬年的美態。Horological Machine No.7「Aquapod」
24 Jan 2017
著名酒評人 James Suckling 形容這瓶 Castiglion del Bosco Brunello di Montalcino Riserva DOCG 2010 Zodiac Rooster 「優雅、美麗、有活力及年輕」,並予以 99 分絕佳評級,說起來尤如看見一位絕世美女一樣,99 ...
watchesandwine
【Castiglion del Bosco】99分佳釀、100分善舉
24 Jan 2017