Photos: Aston Martin

Aston Martin Valkyrie喺2016年7月發表，無論係外形同內櫳都勁有概念車味，令人覺得呢款車距離投產仲有好一段時間。

廠方剛公布更新版本嘅Valkyrie，由頭、尾燈同車門、內櫳、軚盤都好有巿販味道，Aston Martin設計師話呢一部Valkyrie有95%同投產版本相同。

值得留意車廂，碳纖一體化，望落好逼，如困唔係兩張座椅之間有間壁，兩個人坐落去，一定大髀貼大髀。中控台無花巧嘢，只有一個「薄Mon」，位處乘客位前方；略呈橢圓嘅長方形軚盤內置小型屏幕，上面有多組旋扭，賽車味極濃。

引擎方面，配廠方同Cosworth合製嘅6.5公升V12自然吸氣引擎，最大馬力約700匹，並設有KERS系統，波箱屬7前速設計。街道版Valkyrie限製99部，另有24部屬賽道版。街道版Valkyrie仍未有實價，有傳最少要220萬英鎊，即約2200萬港元，如果呢123部Valkyrie賣得晒，唔知Aston Martin可以執到幾多？