{ SKIP }
文:MenClub Mr.波特  圖:互聯網
POSTED ON 12 Jul 2017


今年夏天,英超嘅豪門當然會大手增兵,其中奪得聯賽第4位嘅利物浦下季有得打歐聯,當然需要買多幾個人以作多線比賽之用。而其中,佢地就以破隊史轉會費紀錄嘅3700萬鎊,從意甲球隊羅馬帶黎一位人稱「埃及美斯」嘅前線球員沙拿(Mohamed Salah)。喺沙拿之前,利物浦嘅轉會費紀錄為2011年收購前鋒卡路爾時動用嘅3500萬鎊。




沙拿現年25歲,司職前鋒線,主打翼鋒,而佢個綽號叫得「埃及美斯」當然係黎自埃及啦,並且因為同美斯一樣係左腳球員,喺場上又擁有出色嘅控球能力,所以就獲得呢個稱號。


加盟利物浦前,沙拿係羅馬嘅核心之一,佢為球隊上陣左41場比賽攻入19球,其中喺聯賽上陣31場攻入15球,最終助球隊奪得聯賽亞軍,場上效率算係非常唔錯。雖然今次沙拿由意甲轉會至英超,但係相信佢亦都唔會對呢個聯賽感到陌生,因為佢踢意甲之前就曾經效力英超另一豪門車路士,不過當時佢就並無受到重用,所以連續兩個球季被外租出去,最終去年夏天以1500萬鎊被羅馬買斷。


沙拿作為鋒線人物,個人擁有出色嘅速度,能夠喺鋒線上不斷游走以尋找破門機會,而佢喺場上非常勤力,對於教練嘅戰術執行力亦都相當高。另外,沙拿嘅個人技術出色,佢每一次觸球都有少少美斯嘅影子,就好似會以個人速度、技術、變速等等黎擊潰前面嘅對手,而如果進攻時佢處於右邊嘅話,佢可以Cut入中間用佢純熟嘅左腳射門。另外,沙拿亦擁有為隊友創造破門機會嘅能力,其創造力曾獲得曼聯領隊摩連奴稱讚。


加入左沙拿後,利物浦領隊高普好大機會以沙拿配上文尼組雙箭頭攻堅,相信球隊嘅攻力會因此而得到昇華,特別係沙拿擁有出色嘅突破及創造入球能力,相信將成為對方後防一個惡夢嘅存在。值得一提嘅係,沙拿係羅馬2015-16球季嘅年度最佳球員,當季佢係球隊入球最多嘅球員。而再之前,沙拿效力巴素利期間,助球隊兩奪瑞超冠軍。



當然,沙拿亦需要重新適應英超嘅踢法,特別係身體對抗上,因應佢呢種速度加盤扭嘅打法,好可能會不時被對方進行粗野攔截,引致受傷收場。如果唔可以克服呢個激烈嘅環境,佢可能會再一次好似效力車路士咁令人失望咁離隊了。




空門都唔係入硬架!
hobby
【尷尬到唔敢睇】足球場上唔入仲難過入嘅機會!
20 Nov 2017
睇完佢推出嘅電單車,你都可能會興奮到笑!
hobby
令奇諾開心笑的Arch Motorcycle
20 Nov 2017