總廚Frank話齋：「大件頭！用牛肉去做！就係美式漢堡嘅特色！」無理由咁簡單，究竟美式漢堡肉用嘅係咩材料？「一定係牛肉，仲要用兩個唔同嘅部位，各有比例。」他接著解釋，首先要有65% 牛肩肉shoulder clod ，平時都屬於多運動，肉質實淨纖維多，肉味濃，常用作絞肉； 35% 牛腩肉brisket，腩位雖然屬牛肉中纖維最多，最常作炆炖的處理，但Frank保留部份脂肪，為漢堡扒提供適當油分。

燒肉扒都要打格仔

想做到傳統美式風味的漢堡扒，唔好諗住用屋企塊普通煎Pan就得。Dan Ryan’s 廚房的Charcoal Grill 炭坑爐，溫度高達500度，明火更有燒烤香。燒法亦有橋妙，所謂的「格仔式」燒法，先燒一面，利用炕爐的條紋，將漢堡肉面燙至微焦，再換上方向，令塊肉燒到均勻。想吃Medium 的生熟度，總共燒6分鐘，擔心拿不準熟度？探佢中心溫度，約130度即可。

配菜嫩口爽脆先至好

個包都要留意，自家食譜取Brioche 法式包，由本地烘焙坊製作，只落牛油、蛋、麵粉，走鬆軟路線，組裝之前先要烤過，再搽上醬汁，有蛋黃醬、酸瓜同香草。車打芝士是美國最常見的芝士，經典唔會錯，趁漢堡扒煎好放上去，微微溶化。其餘則要有牛油生菜、蕃茄、紅洋葱數款新鮮蔬菜，貪佢嫩口爽脆，食到個口感之餘，亦為這個龐然大物解解膩。

Chi-Town Combo $298

一次過食齊餐廳最美式的頭盤，焗薯片、炸洋葱圈和水牛城雞翼，奉籲各位一句，四人以上先好叫，因為最初食得太興奮，後期飽到震......

Dan’s Classic CheeseBurger $158

店中皇牌，正如總廚Frank所講，份量大，單吃漢堡肉已覺得飽。包身鬆軟，肉扒調味得宜，不會搶走肉味的風頭。芝士另可選高達芝士、藍芝士、瑞士芝士等。

Delux Chili Burger $188

另一道典型的美國味，就是加入墨西哥Jalapeño的辣肉醬漢堡，不算太辣，每啖都有些微刺激，好辣者必點。

Milkshake $90

食漢堡當然要配最地道飲品，有雪糕有忌廉，甜度高，極濃極稠。坦白講除非你有美國人的胃口，我飲完呢杯都飽咗6成。