{ SKIP }
文:MenClub Mr.波特  圖:互聯網
POSTED ON 19 May 2017

「越位」這個詞語相信對於唔少巴打黎講可能係惡夢,因為真係好難解釋比人聽究竟係點解,特別係女性朋友。不過,有一啲球員對越位卻係又愛又恨,而佢就更加係一生都同越位拉上關係。



菲利普恩沙基(Filippo Inzaghi),一位著名嘅意大利前鋒,綽號「大恩」或「越位王」,退左役一段時間現年43歲嘅佢宜家已經成為一名足球教練,並執教緊意乙球隊威尼斯。



球員時代嘅佢都算得上係非常風光,雖然入球產量唔算得好高,但係佢入親嘅波都係價值連城,其中相信最令人印象深刻嘅應該會係2007年歐聯決賽面對利物浦攻入嘅第2個入球,就係呢個入球為AC米蘭奠定勝局,並成功助球隊一報2005年歐聯決賽落敗嘅一戰之仇。


恩沙基自9歲開始進行足球訓練,並喺12歲加入意大利球隊皮亞琴察嘅青訓,一直訓練到18歲(1991-92球季),呢位射手終於成為球隊嘅一隊成員。不過,成為皮亞琴索一隊嘅恩沙基,喺個一季只為球隊上陣左3場比賽。



由於太過年輕,所以皮亞琴察決定將恩沙基外借出去,1992-93球季佢就被外借到意丙球隊阿爾比諾萊費,但佢並無放棄自己,並喺呢一季上陣21場比賽攻入13球。之後一季,皮亞琴察再次將恩沙基外借,今次佢就被外借到意乙球隊維羅納,而呢一季佢就為球隊上陣37場攻入14球,說明佢真係一位有潛力嘅新人。


之後1994-95球季,恩沙基終於可以重返皮亞琴察上陣,而呢一季佢上陣41場攻入17球,表現持績上升。不過好快,恩沙基就離開左皮亞琴察轉投帕爾馬,並正式喺1995年迎來佢首場意甲比賽。



可惜嘅係,恩沙基喺帕爾馬並無太多上陣嘅機會,令佢無辦法喺意甲證明佢嘅入球能力,最終短暫效力一季後又再次離隊他投。離開帕爾馬後,恩沙基轉投同為意甲球隊嘅阿特蘭大,而今次佢終於搵到一支可以比佢發揮自己嘅球隊。



效力阿特蘭大呢一季,可以話係恩沙基證明自己入球能力嘅代表球季,因為佢上陣33場意甲賽事攻入左24球,並且喺攻破左全部另外19支球隊嘅大門。最終佢獲選為當季嘅最佳年輕球員,兼且喺賽季最後一場比賽入面,阿特蘭大仲比埋隊長恩沙基做,要知道個陣恩沙基先得23歲,實在係不可多得嘅人才。


就喺阿特蘭大踢出最佳賽季表現後,恩沙基被意甲班霸祖雲達斯相中,並以高價230億里拉(即現時1188萬歐元)收歸旗中,與迪比亞路及施丹等巨星成為隊友。加盟祖記首季,恩沙基並無任何唔適應,他全季交出27個入球,其中包括18個聯賽入球,成功為祖記帶來了意甲冠軍,而呢個亦係恩沙基生涯首個意甲冠軍。



之後恩沙基嘅表現亦繼績保持喺唔錯嘅水平,但係祖記就無咩冠軍落袋,係1999年拎到一次圖圖杯冠軍,但個陣時嘅恩沙基已經因為查斯古特加盟被擠進後備,所以佢只好再一次轉會。今次,恩沙基以700億里拉(即3615萬歐元)轉投AC米蘭,而呢次轉會亦係恩沙基球員生涯最後一次轉會,因為佢終於搵到家嘅感覺。

加入AC米蘭後,恩沙基與當時球隊嘅首席射手舒夫真高成功擦出火花,組成超強鋒線組合,一個就係進攻多面手,一個就係機會主義者,好快AC米蘭就憑住呢對前鋒組合喺2002-03球季殺入歐聯決賽,而咁岩恩沙基就喺決賽撞正舊主祖雲達斯,最終雙方戰至12碼決勝負,而AC米蘭以3:2擊敗對手取得冠軍,值得一提嘅係恩沙基喺呢季歐聯入左10球,排名歐聯射手榜第2位。


喺2003年奪得歐聯冠軍之後,恩沙基嘅表現開始因傷病下滑,直到2006-07球季佢再一次登上巔峰,成為杯賽殺手。2005年AC米蘭在歐聯決賽上被利物浦奇蹟逆轉,但2007年兩支球隊再一次會師歐聯決賽,今次恩沙基成為最大嘅功臣,因為佢為球隊帶黎兩個入球,其中第一球全靠罰球射中佢嘅背部改變方向而入網,第二球就憑住佢反越位成功,令球隊鎖定兩球嘅優勢,最終以2:1擊敗利物浦,以報兩年前一戰之仇。


喺退役前,恩沙基一共喺AC米蘭效力左11個球季,上陣場次達到300場,攻入126球,為球隊帶黎2次歐聯冠軍、2次意甲冠軍、1次意大利杯冠軍、2次意大利超級杯冠軍、2次歐洲超級杯冠軍以及1次世界冠軍球會杯冠軍。

喺國家隊,恩沙基並唔係球隊嘅絕對主力,但係佢為國家隊上陣57場比賽,仍然攻入25球,效率都係算得上非常高的,並且佢亦係意大利2006年奪得世界杯冠軍嘅成員之一。所以,恩沙基都算得上喺冠軍上再無咩遺憾。


恩沙基作為前鋒,一生都喺越位線上跑動,佢雖然一場可以有非常多嘅越位,但係只要佢有一次係無越位,佢就可以將呢個機會化成入球,2007年歐聯決賽第2個入球就係佢嘅代表作。所以,當有人不斷話佢只係識越位有咩用嘅時候,佢就會用絕妙嘅走位為球隊帶黎入球。


其實諗番恩沙基呢種不斷越位嘅做法,都真係令旁證幾頭痛,因為佢嘅走位都真係可以睇到旁證眼花,咁樣隨時令旁證有機會睇錯一次。不過無論點都好,恩沙基絕對係足球史上最強大嘅越位王,亦係歷史級別嘅大賽球員。

姚基金慈善賽公佈左陣容之後,大批球迷大感不滿及要求退飛,大會隨即再嘗試邀請球星黎講坐陣,最終成功邀請「半人半神」Vince Carter參戰!
hobby
【補飛!】「半人半神」Vince Carter將參戰姚基金慈善賽!
28 Jul 2017
原來馬田斯宜家都只係32歲咋!
hobby
【速度99】退左役?馬田斯原來只有32歲兼喺中超踢緊!
28 Jul 2017