- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
踢波如果你唔係為左餐飯，我諗你都係為左開心，而數到足球史上踢波最開心最快樂嘅球員，相信一定會係巴西傳奇球員 - 「細哨」朗拿甸奴。細哨踢波總係會面帶笑容，所以可以感受到佢真係好享受足球，而正正因為佢呢份享受，佢總係可以踢出最悅目嘅足球，帶比我地一班球迷無限嘅快樂。 | |
| 現年37歲嘅細哨，雖然仲未宣佈退役，但係自從2015年後就再無班落，並開始轉戰參加一啲五人足球賽，繼績享受足球帶比佢嘅樂趣，同時亦都令球迷仍然可以欣賞到佢嘅腳法。 | |
| 講番細哨嘅球員生涯，佢1980年喺巴西城市阿雷格里港出生，母親係一名護士，父親係一名船廠工人，但同時亦都係高士路球隊嘅球員。不過後來細哨嘅父親因為心臟病突然離世，令細哨細細個已經無左爸爸。 | |
| |
| 1987年，細哨甸奴跟隨爸爸及哥哥加入甘美奧嘅青訓，直到佢13歲嘅時候，佢第一次獲得媒體嘅報導，因為佢嘅球隊喺一場比賽入面以23：0擊敗對手，而呢23個入球全部都係由細哨一人攻入，就係咁呢位小伙子就被人認定為足球壇入面一位超新星。 | |
| 1997件，朗拿甸奴代表巴西U17國家隊參加世少盃，最終佢喺賽事攻入左兩個，助球隊喺決賽擊敗加納奪得冠軍，而呢次係巴西隊歷史上首次奪得世少盃冠軍。因為喺世少盃有出色嘅表現，細哨成功喺接住嘅球季正式喺甘美奧出道。成為一隊成員後，細哨好快就喺甘美奧取得成功，佢喺1999年球季上陣48場攻入23球，其中喺1999年6月20日嘅一場比賽，呢位19歲嘅天才球員面對94世界盃巴西傳奇隊長鄧加嘅時候，竟然三番四次以腳下功夫戲弄對方，其中包括超高技技嘅後腳「牛尾巴」，最終細哨成功攻入全場唯一嘅入球從而擊敗對手。 | |
|
| |
| 喺2000年球季，細哨表現持續上升，全季上陣49場攻入41球，令佢成為一眾歐洲豪門嘅目標，其中包括英超嘅阿仙奴，但由於細哨唔係歐盟成員國嘅球員，所以未能取得工作證。就係咁，細哨呢段經歷又可以成為阿仙奴領隊雲加險簽系列之一。 | |
| 未能加入阿仙奴，細哨喺2001年以500萬歐元轉會費轉投法甲球隊巴黎聖日耳門，並與球隊簽下5年合約，正式登陸歐洲聯賽，而當時嘅聖日耳門陣中有著傳奇球員奧高查以及安歷卡，其中奧高查更加成為細哨喺球隊入面嘅導師。就喺聖日耳門效力期間，細哨實力突飛猛進，無論係個人盤扭、自由球、速度等都成為對手嘅惡夢，而外界亦開始關注呢位巴西新星。 | |
| |
| 2002年日韓世界盃，只有22歲嘅細哨成功入選巴西國家隊大軍，而佢並唔係好似1994年嘅朗拿度咁做大後備，而真係陣容上其中一位主力球員。雖然賽事入面細哨只係攻入左兩個入球，但係其中喺8強面對英格蘭笠死對方門將施文嘅自由球就成為世界盃金球之一，最終巴西亦成功奪得年當屆嘅世界盃冠軍，而細哨就被稱為巴西傳奇鋒線組合3R之一，其餘兩人為朗拿度以及李華度。 | |
| 雖然個人能力出眾，而又喺世界盃奪得冠軍，但朗拿甸奴與聖日耳門卻鬧出不和，最終喺2003年夏天正式離隊，以3000萬歐元轉投西甲班霸巴塞隆拿。加入巴塞後，細哨正式達到個人巔期峰時期，而佢嘅加盟亦拯救左當時表現不濟嘅巴塞。細哨喺場上表現越踢越順，期間不斷以魔術一般嘅踢法帶黎入球或助攻，令球迷睇到如痴如醉。加盟巴塞第一季，細哨就已經喺45場比賽攻入22球，但係球隊因為賽季初表現惡劣，所以未能奪得任何冠軍。雖然球隊無任何冠軍落袋，但係細哨喺2004年呢一年成功壓過阿仙奴前鋒亨利，成為世界足球先生得主。 | |
| |
| 2004-05球季，細哨終於助巴塞奪得西甲聯賽冠軍，要知道當年巴塞已經連績5年失落聯賽標錦，所以可想而知細哨嘅重要性。而由於表現出色，細哨亦喺呢一年成功衛冕世界足球先生獎項，並且贏埋金球獎及歐洲最佳前鋒兩個大獎。 | |
| |
| 2005-06球季，朗拿甸奴迎黎個人生涯最出色嘅一季，佢帶領巴塞成功衛冕西甲聯賽冠軍，又助球隊史上第二次奪得歐聯冠軍，相信唔少球迷都好記得當年歐聯決賽巴塞面對阿仙奴嘅情況。而細哨嘅表現有幾出色，只要你睇番佢對皇馬嘅國家打吡，佢嘅表現係可以令到皇馬球迷為佢呢位對手鼓掌的，係自阿根廷球王馬勒當拿後首位得到呢種待遇嘅球員。憑住呢一年出色嘅表現，細哨亦首次獲得歐洲足球先生呢個殊榮。 | |
| 令人婉惜嘅係，細哨喺2006年帶領巴西隊出戰德國世界盃，但喺球隊喺8強就已經不敵法國出局，而細哨亦因此受到外界嘅批評，陷入其生涯嘅一個低潮。失落世界盃重返巴塞後，細哨嘅個人表現雖然沒有好大嘅影響，但係就有傳佢同教練及隊友伊度奧鬧不和，最終球隊連續兩季四大皆空，而就係咁導致巴塞決定係時候改變。 | |
| 2008年夏天，細哨正式離開巴塞，而就係佢離開前卻指定美斯係佢嘅繼承人，要求只可以由佢穿起10號球衣。正正係細哨當年仲喺巴塞時嘅幫助下，美斯正式成為當今球壇嘅球王。離開巴塞後，細哨轉投意甲嘅AC米蘭，轉會費為2400萬歐元。 |
| |
| 加盟米蘭後，細哨嘅入球能力明顯已經大不如前，但佢嘅助攻卻依然非常出色，佢喺第二季(2009-10年)就為米蘭交出17次助攻，兼且攻入15個球季，係球隊中表現最出色嘅球員。可惜喺咁好嘅表現支持下，細哨都係落選2010年巴西世界盃大軍，有傳係因為當時巴西領隊鄧加仲記住當年被細哨喺場上戲弄嘅仇，所以決定唔揀佢入選。 | |
| 2010-11球季，米蘭引入瑞典神鋒伊巴謙莫域以及意大利前鋒卡斯辛奴，因此細哨嘅作用開始變得可有可無。最終喺2011年1月，細哨同米蘭達成共識，決定重返巴西為法林明高踢球。 | |
| 重返巴西後，細哨就好似重獲新生咁，佢嘅快樂足球亦開始重新展現喺人前，其中佢喺2012年6月轉投明尼路，之後喺2013年帶領球隊贏得南美自由盃冠軍，成為足球史上第7位曾獲得歐聯及南美自由盃冠軍嘅球員。之後細哨曾轉戰墨西哥聯賽效力，其後再一次重返巴西，加盟富明尼斯，但加盟2個月後細哨同球隊達成共識，決定斷前終止合同，之後呢位巴西傳奇就再無班落，直至今日。 | |
| |
| 雖然無班落，但係細哨並無宣佈退役，佢繼績參加唔同類型嘅足球比賽，好似室內5人足球，另外佢又曾經協助推廣乒乓足球，總之喺佢生命入面足球係唔會停止的。而佢嘅笑容亦絕對係足球嘅最佳推廣，因為當睇到佢踢波嘅時候，總係會覺得好開心，快樂足球嘅代表，真係非細哨莫屬！ | |
|
|