Photos: Columbia Circle Japan

有時真係好佩服日本一啲專門為電子產品生產配件嘅廠商，總之佢哋就攪盡腦汁，有本事推出一啲真係好啱用，但正廠偏偏唔會推出嘅配件。

靠製作家庭電玩配件撈起嘅日本Columbia Circle，繼今年初推出「迷你紅白機」收納箱之後，今年10月5日將會發表「迷你超任」收納箱（SFC Storage Box）。

SFC Storage Box定價1998日圓，$150港元有找，平就唔講得上㗎嘞。不過，有個企理啲，又有特色嘅手提箱裝住，總好過拎個唔知乜頭乜路嘅不織布袋入住吖。

收納箱採用灰色PVC塑料製造，有超任feel，加埋手掣招牌四色鍵，就算他日踢佢入迷你倉，突然黐起條根想摷返佢出嚟都唔會好難。箱內有一塊以魔術貼繫緊嘅隔板，布局與「迷你紅色機」收納箱差不多，都係分開主機同手掣，減少撞嚟撞去嘅機會。