「泥地王」拿度因膝傷困擾，年終賽決定退賽

文：MenClub 波特先生　　圖：互聯網
POSTED ON 15 Nov 2017

較早前已經喺英國倫敦展開嘅網球ATP年終賽，各位世界排名最前列嘅球手已經相繼亮相，但好可惜嘅係，岩岩拎到生涯第4個嘅年終世界第一嘅「泥地王」拿度卻因為膝傷困擾而宣佈退賽，生涯至今仍然無法奪得呢項賽事嘅冠軍。

其實喺年終賽開始前，拿度已經知道自己膝部有傷，佢喺巴黎大師賽8強決定退賽，就係希望可以盡可能為年終賽調整狀態。不過，準備始終時間太短，拿度只能夠帶傷參賽，而佢喺第一場面對世界排名第7嘅哥芬，雖然已經拼盡全力，但最終都係以1：2落敗。

賽後，拿度無奈表示自己已經盡左最大努力，能夠同對方打得咁接近已經係奇蹟，但始終膝部傷得太重，故只能夠宣佈退出年終賽，而佢亦同時宣佈自己2017年嘅所有賽事已經完結。

拿度退賽，大會立即搵黎世界排名第10嘅Pablo Carreno Busta替上，佢將會完成拿度未能夠完成嘅比賽。同時，無左拿度後亦代表世界排名第二嘅「瑞士天王」費達拿將成為賽事大熱門，佢目前已經贏左兩場，小組出線已經唔成問題，並將會挑戰生涯第7次奪得呢個大賽嘅冠軍。