雖然話大部份玩LEGO嘅人都係跟住說明書砌，但其實LEGO公司嘅願境係希望大家發揮創作，利用LEGO磚創作出自己嘅作品。而有人就將呢個精神發揚光大，唔單止砌LEGO，仲直頭改LEGO，令「LEGO人仔」變成一個個大家熟悉嘅ACG角色。

於IG上嘅「brickcrafters_workshop」去年九月先正式成立，但至今已經有部2.8萬名追蹤，靠嘅就係佢哋精心改裝LEGO人仔。佢哋嘅第一套作品，係來自著名遊戲《League of Legends》嘅Netflix動畫《Arcane》中嘅Jayce、Jinx及Vi，隨後亦曾推出如《恐龍戰隊》、《Warhammer 40k》、《Gundam》、DC、Marvel，以及《One Piece》、《進擊的巨人》、《鬼滅之刃》等ACG作品嘅角色人仔。每個LEGO人仔都維持原本比例及結構（即係腳、身、手、頭、頭髮五部份），再利用特製組件及配件還原角色神粹，而且還原度仲相當高。

佢哋嘅官網上甚至有得直接買製成品，而且價錢相當宜人。好似一套《進擊的巨人》人仔，包四大主角及四套裝備，每人仲多一個表情頭部，再加四隻雙倍大小嘅巨人，特價賣緊港幣$235，除開每隻人仔30蚊都唔使，比起去官網買人仔鎖匙扣更平。不過要注意嘅係，估計為咗躲避版權問題，所以啲人仔嘅名全部都略有出入，好似DC漫畫系列只叫「D Comic」、《One Piece》就叫「Pirates」咁，建議大家都去佢個官網睇下有冇嘢啱心水啦。

資料來源：brickcraftersworkshop