{ SKIP }
文:李羅渣  
POSTED ON 01 Jan 2017


上季英超講降班膽個個都識講係阿士東維拉,而今季就到天鵝史雲斯可以準備定下季英冠。其實上季佢哋成功護級都有啲勉強,今季天鵝成績更加嚇人,成個12月成績係6戰1勝5負,輸波嘅比賽全部起碼輸3球。十月初佢哋炒咗領隊古杜連(Francesco Guidolin)後,Boxing day後再炒埋只教咗八十幾日嘅巴特利(Bob Bradley),至於新領隊人選,佢哋係未有著落嘅。



史雲斯嘅問題,都係唔少英超新興勢力會面對嘅典型問題。財力唔夠其他球會,隊中主力不斷離隊。2016年最關鍵就係中場舒維爾(Jonjo Shelvey)同隊長兼中堅艾殊利威廉斯(Ashley Williams)分別轉投紐卡素同愛華頓,雖然留得住施古臣(Gylfi Sigurðsson),不過近兩季加盟嘅球員都唔多對辦,外間更盛傳天鵝球員對訓練強度非常不滿,引致將帥不和。當中寄誠庸就有傳因爲同前領隊古杜連衝突,所以今季長居後備,只有6次英超正選上陣,而且未入過波。而今季加盟表現不俗嘅西班牙前鋒洛蘭迪(Fernando Llorente)更有傳被干地睇中,1月可能加盟車路士同干地續前緣,如果呢單轉會成真,史雲斯今季都係咁先。



踢波嘅嘢,有士氣點都唔會太差,但今季史雲斯真係好似完全無抗爭意志,真係有身份證就入到波。最深刻係主場對曼聯嘅比賽,史雲斯嘅防守非常消極,曼聯今季把握力出晒名差,但仍然輕而易舉地喺上半場入兩球,最後以3-1完成比賽。而12月被視為最重要嘅英超快車只得1勝5負,輸波都唔算唔得人驚,成個12月總共失咗18球呢個數字就好嚇人。



暫時有可靠消息指前打比郡領隊Paul Clement已經同史雲斯傾好合約,等官方宣布就可以正式上任。老實講,我對呢位領隊無乜認識,但查一查資料,原來Paul Clement曾經係安察洛堤嘅副手嚟,更跟隨肥安效力過車路士、PSG、皇家馬德里同拜仁慕尼黑。上季接替麥卡倫坐正打比郡領隊一職,拎到14勝12和7負嘅成績,被炒時排第5,最後打比郡亦以呢個名次完成上季英冠,成績唔算差,睇嚟佢都有料到,點解咁都要炒我都唔係好明白。今日就開始冬季轉會窗,Paul Clement 第一個挑戰就係一月要買到適合嘅人腳搶分護級,如果一月有咩行差踏錯,今季史雲斯就係咁先。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、MenClub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青






2017年已在倒數階段,不久便踏入聖誕節,在這溫馨佳節,仍對買甚麼禮物感到頭痛的話,不妨從一些傳統又具個性的飾物着手。好像風行全球的國際珠寶品牌PANDORA,它高貴而女性化的飾品系列,一直深受女士們歡迎。例如P ...
style
【別具心意的聖誕禮物】PANDORA 聖誕優惠Gift Set系列
14 Dec 2017
望一望真人版嘅人設,再望一望呢個Figure,果然係順眼好多。
hobby
G.E.M.《鋼鍊FA》愛德華
14 Dec 2017
今季目前為止,NBA戰績最好嘅球隊係黎自西岸嘅火箭,佢地暫以21勝4負(勝率84%)排名聯盟第一。而呢支近年長期被勇士壓住嘅德州球隊能夠暫以半場勝差領先,其中最主要嘅原因除左有Chris Paul嘅加盟之外,首要就係佢地 ...
hobby
【挑戰命運Vol.1】大鬍子Harden今季將最大機會首奪MVP?!
14 Dec 2017