(1)MK情人系

(2)食嘢系

(3)懷舊系

(1)   MK情人系

MK情歌相信大家都聽過，諸如兵仔苦等女神，愛人唔要自己好L心酸，都係MK系情歌嘅一大標記，至於口語入詞嘅MK情人系歌曲，主要係用第一身同愛人講嘢嘅方式嚟描述嗰種MK情懷：

《你講你愛我》 主唱：Twins

金句：「你講你愛我/講我知你愛我/話佢聽你愛我/等佢知道佢錯」

評價：呢首歌係講兩女爭一男嘅，但呢種要「當住條女面攬下我，等條女知你愛我多啲」嘅諗法真係MK到令我諗起MK活地阿倫葉念琛嘅電影。

《你唔愛我啦》 主唱：李彩樺

金句：「是但啦/算數啦/唔煩你啦/無人錫我啦」

評價：膾炙人口嘅膠歌一首，將港女嗰種煩膠同無理取鬧共冶一爐，聽完想打人。

另外仲有兩首比較冷門，都係由黃偉文執筆，同埋識食到極嘅鄧建泓主唱，係以MK男嘅角度氹返女友嘅，可惜Youtube冇片畀大家睇。

《怕咗你》   主唱：鄧建泓   

金句：「怕咗你/我講對唔住呢一次/當我唔啱」

評價：可以用嚟回應返講《你唔愛我啦》對白嘅港女。

《你咪當我傻》  主唱：鄧建泓   

金句：「係你最傻/唔係我/你有冇認真諗過」

評價：氹唔掂唯有來硬的，通常犯賤嘅女人會受呢套。

(2)   食嘢系

食嘢系嘅歌唔多，但食嘢食紅嘅歌都唔少，例如係秋官首《香港料理》，至於用口語嚟玩嘅廣東歌就有：

《食軟雪糕》  主唱：莊冬昕

金句：「食軟雪糕/雪糕/雪糕/好味好味好味好味道」

評價：洗腦歌嘅經典。

《請你食麵》  主唱：吳綺珊、麥皓兒

金句：「麵麵麵麵麵麵麵麵麵/請你食麵」、「食麵好比友情的喻意」

評價：食麵關友情乜L 嘢事。

(3)懷舊系

其實好多70、80年代嘅歌都係用口語入詞，仲要係用極正宗嘅廣東話！

《蝦妹共你》  主唱：許冠英

金句：「蝦妹共你 我開親口會夾條脷/實在一睇到你就冚身爽死」

評價：又脷又爽死，都幾意淫，I Love It，同埋曾有高登巴打改咗做咸濕歌，唔好以為我哋唔記得。

《賣身契》  主唱：許冠傑

金句：「我發起啷黎/會將你墊屍底/認真巴閉」

評價：啲詞好有本土味，「啷黎」、「墊屍底」、「巴閉」三個呷嘅韻都係用廣東話口語詞，而家好少見咁道地嘅詞喇！