{ SKIP }
文:MenClub Mean娜  圖:MenClub
POSTED ON 04 Nov 2016

有「迷幻王子」之稱嘅Yoga(林宥嘉)出名非常唱得,當年喺台灣歌唱選秀節目《超級星光大道》中,已經好似漆黑中嘅螢火蟲一樣,咁鮮明,咁出眾!不但多次奪得佳績,更係節目開播以來,第一位獲得兩次25分滿分嘅正式參賽者,佢嘅歌聲喺台灣及香港傳媒間都有高度好評。


雖然Yoga於音樂事業巔峰期離開樂壇,入伍服兵役,但粉絲一樣冇忘記Yoga嘅聲音,繼續支持佢。2016年,闊別四年,Yoga以新專輯《今日營業中》強勢回歸,身為鐵粉嘅MenClub編輯Kay同小雲都興奮到要跟去採訪,仲係咁R影合照添~Actually,講得「強勢回歸」,專輯團隊陣容絕非等閒之輩,淨係講有Eason陳奕迅教Yoga唱廣東話歌,已經夠勁抽啦!





離開樂壇四年,人大咗,經歷多咗,途中仲去當兵,Yoga同以前比,一定有所改變,單單係入伍一事,已經對佢有許多新啟發,例如服兵役時第一次剃光頭,發現原來自己額頭好高!(笑)當然~除咗呢啲新「啟發」外,喺音樂路上都有新嘅體會︰「服兵役的時候,聽不到音樂、看不到電視,所以身邊不會有那麼多外面的聲音,就覺得很無聊……於是我常常自己哼一些旋律給自己聽,所以反而在服兵役期間會很容易寫歌出來。」 Yoga仲話,由於入伍時真係太少機會睇電視,所以當長官搬個電視出嚟開心些牙時,大家都會爆興奮,普通一首歌都會令佢聽到有「觸電」嘅感覺,佢都好希望自己可以做出令人咁有Feel嘅音樂,相信以Yoga嘅實力及才華,要令大家聽到「耳朵懷疑」絕對0難度啦!


可能就係基於呢種信念,新專輯《今日營業中》先得到「零負評」美譽,可謂Yoga史上一大突破!「很多樂評聽了這張專輯後,幫它取了一個名字叫做『零負評』。我一開始以為『Lin Fu Pin』是誰呢?以為是一個跟我一樣姓『林』的人,原來他們的意思是這張專輯有很多朋友給了好評, 所以叫『零負評』專輯。 這也是個突破,因為對我來說,之前沒有專輯被稱讚過『零負評』。」







的而且確,大家對新專輯評價都好好,但Yoga今次嘅成功絕非靠彩數,佢堅係出心出力出盡奶力去籌備,甚至自己處女擔任製作統籌,務求令專輯十全十美。對於第一次任製作統籌,Yoga笑言仲以為老闆之後佢就係最大粒,想點就點,可以舞人做嘢,但原來完全唔係呢回事︰「因為我是製作人又是歌手,所以這張專輯會不會成功都是我造成的,所以我壓力很大,然後在錄音室裡常常『謝謝老師、謝謝大家~要吃什麼呢?』跟我想像中不一樣,有點被騙的感覺(笑)。」 結果由邀歌、創作、討論歌詞同編曲方向、混音到最後母帶完成等等,每一個過程,林宥嘉都要親力親為去參與其中。


除咗Yoga嘅努力,今次新專輯班底都非常威威,Yoga邀請咗長岡亮介、陳奕迅、林夕、黃偉文、吳青峰、陳珊妮、小安、施人誠、林家謙、Jerry C、荒井十一、Eric Kwok、黃中岳、丁世光、陳信延、陳惠婷、鄭楠等等音樂人,聯手完成《今日營業中》。當中香港人最留意嘅,就係專輯入面首次收錄咗廣東歌《壞與更壞》。


喜歡Yoga嘅人都知道,Yoga一直以來都熱愛廣東歌,所以今次自己揸旗製作新專輯,佢好希望可以擁有屬於自己嘅廣東歌,於是誠邀Eric Kwok為佢寫歌,並膽粗粗詢問偶像陳奕迅有冇興趣幫Yoga負責配唱製作。為咗對得住Eric Kwok及Eason嘅幫忙,更為咗對得住自己嘅心願,Yoga非常認真咁密密練習廣東話,而《壞與更壞》對Yoga而言,亦有好特別嘅意義︰「這是我很想回饋歌迷的心情,因為要去當兵,又四年沒有發專輯,所以我想如果還有機會做音樂的話,試用一種更接近他們的語言去唱,便想到要唱廣東歌。」








不過對Yoga私心而言,《壞與更壞》製作期間最開心當然係可以同偶像Eason合作,見到偶像之餘,仲要坐隔離教唱歌,Yoga開心到一個點,內心小鹿亂撞,但基於專業又唔可以表露出嚟。不過,興奮還興奮,Yoga話Eason真係教咗佢好多嘢︰「比如Eason會教我這個地方唱平一點或往下一點,聽起來會更加優雅,而且他清唱也非常好聽!」好聽到點?好聽到Yoga嘅同事都無視佢,忘我地讚頌Eason,反而Yoga唱成日都冇人讚佢,搞到Yoga都唔知好嬲定好笑,不過既然係自己偶像,當然心甘命抵啦~



Venue︰The Luxe Manor
Make up︰Omix B
Hair︰Walter Chan @hc Taiwan 
Video︰Ricky@MenClub
Photo︰Sam@MenClub


希望觀眾及喜歡《先入為主》的人都會品嚐得到《較早前錄影》歌詞中的痛,姑勿論這兩首歌是說什麼,希望大家在被標籤的鬱結上若要舒一口氣的話,可以連續唱這兩首歌。 ... ... ... ...
people
可否抹清舊有印象——吳浩康
10 Nov 2017
有「東京首席華人皮條客 」之稱的李小牧, 與中國導演邢菲合作拍攝了一部參選區議員的紀錄片《選挙に出たい》。
people
案內人到選議員 李小牧紀錄片
06 Nov 2017