{ SKIP }
文:MenClub Mean娜  圖:MenClub
POSTED ON 31 Mar 2017


《大時代》雖然係九十年代初出品,但因為太經典,到今時今日,邵仲衡出街依然成日有fans要求selfie,有啲人會叫佢丁孝蟹,有啲人會叫佢邵仲衡。

我成日都講,如果你叫我『孝哥』我一定會好開心,但你叫我『邵仲衡』我會更開心囉!不過通常我第一個回答都係︰『唔使客氣,嚟啦!』哈哈哈哈!」
咁fans們下次見到邵仲衡就要識做,知道要點yo喇~

《大時代》中飾演丁孝蟹嘅邵仲衡,當年憑俊俏外貌及冷酷形象嬴得大量粉絲,兩年前神劇重播,再次審視年輕時嘅邵仲衡,唔少觀眾都表示今時今日嘅佢,比以前更Charm更有型,歲月痕跡令佢更有男人味。

邵仲衡就笑言︰「我始終相信一樣嘢,唔到你唔服,人會衰老,最重要係保持心境,同埋知識、對新鮮事物嘅追求,或者去見多啲新事物,等自己好似一部機咁可以reboot再reboot,就真係唔使怕年月增長,老去咪老去囉,因為呢樣嘢對我嚟講唔係好大影響。」




邵仲衡53歲都keep得咁好咁受歡迎,一定少不了異性埋身。
其實佢已名草有主,結咗婚成十幾年。
唔知作為一位型佬,又係點睇愛情點睇婚姻呢?

邵仲衡︰「人係需要愛情,當然專一就最好不過,但都唔代表你唔可以去欣賞你覺得眼前一亮嘅異性,如果你話完全唔睇,咁其實唔係好現實。尤其是我哋做呢行,遇到好多唔同對手、好多感情戲,或者同場遇到好多好靚、好豔麗、好突出嘅合作伙伴,咁做呢行有樣好,就係你可以好多機會去欣賞佢哋,而我都好樂於去欣賞同埋同佢哋合作。」

咁唔知喺選擇配偶方面,邵仲衡又會唔會一樣咁睇重外貌呢?
「如果話完全唔睇外表,咁就唔係好現實,但係亦有一樣嘢,所謂傳統智慧就各花入各眼,每一個人靚嘅標準都唔同,比如我覺得好靚好靚,但人哋又覺得唔係好靚。」
話雖如此,佢都建議如果你想儘量令人眼前一亮,就千祈唔好偷懶,努力執正自己實會加分。


你哋努力執正自己加分就為咗脫離單身,但結咗婚十幾年嘅邵仲衡就表示,婚後有時發覺「其實自己一個更開心」︰「我覺得結婚之後保持一個單身嘅時間、一個人靜落嚟嘅時間係好好嘅,甚至可以話對我個人嚟講係好重要嘅事,可能每一日都要有啲時間去獨處,有時大家分開吓反而會令段感情更加好,日日對住得多其實會flat嘅,呢個係真。我覺得有時行開下其實仲好,又係傳統智慧啦,『小別勝新婚』嘛!冇講錯架,係真架呢樣嘢!」


就咁聽呢番見解都覺得邵仲衡心態都仲keep住咁young,佢亦都承認其實自己仲有細路仔嘅一面︰「我成日都同人講,有啲你鍾意嘅波鞋,係唔使慢慢揀,你見到佢就點都要買咗佢。即係你見到佢,你個腦就會即刻諗︰係呢對架喇,係要去買,你亦都唔會點睇幾多錢,貴極有限啫。
「你要左諗右諗買唔買,其實嗰對就唔值得買,我覺得通常男人都會係咁。」

多年前曾涉足汽車改裝生意,唔知而家係咪仲咁鍾意車呢?
「我覺得呢樣嘢改唔到,我記得我十五、六歲嘅時候已經開始有習慣係去廁所嘅時候都要睇車書,咁終於睇埋睇埋後來就有十幾年做關於汽車嘅生意。咁唔知係咪因為我自己對自由嘅需要,汽車係可以擴闊你嘅活動範圍,我諗唔多唔少都係心理反射嚟,加上汽車無論係機械嘅配搭、設計、形狀、Styling嗰啲,其實一路反映人類社會又或者美學嘅前進,係好多姿多彩架。」
「人點可以冇自己喜歡嘅嘢,咁我覺得呢啲係好嘅,同埋可以畀到你正能量,令你可以喺生活中繼續向前行嘅燃料。」

面對喜歡嘅事物,邵仲衡有一份執著與堅持。
佢曾經喺香港理工大學修讀design,非常欣賞北角皇都戲院嘅設計,加上戲院歷史悠久,邵仲衡不忍戲院被拆,甚至拍片支持保留戲院。
面對逐漸陌生及商業化嘅香港,邵仲衡認為未來香港一定會繼續有好多事物改變︰「每一個文化嘅系統都會改變,但應該對自然、保育等等發揮得更好。點解人哋去旅行,第一、第二名嘅旅遊城市唔係倫敦就係巴黎,因為倫敦同巴黎嘅市中心方圓十里都係啲舊樓,起碼都一、二百年歷史。其實啲人去到就係想睇呢樣嘢,你唔好唔記得喎,佢哋都係一啲財經中心,所謂經濟好發達嘅城市,咁唔代表佢要殺晒所有舊樓,而係要揀啲啱嘅、適合嘅去保留。」




然而近年香港政治動盪,邵仲衡即使更愛香港,都曾經諗過離開︰「其實有段時間我都動搖,早幾年你見好多嘢都唔太對路。我諗我係好典型嘅香港仔,我又經歷過返國內,去過日本同人做生意,去過歐洲、美國、澳洲同唔同人互動,喺經驗中唔多唔少會建立到價值觀,跟住會發覺而家香港有好多嘢唔妥,又京官南下周圍又封晒水馬,其實有咩咁重要,重要係大家開開心心,你咁驚人哋去示威又或者發表同你唔相同嘅意見,咁何必嚟呢?嚟都係想聽人意見。咁你嚟到啲人又返工又返唔到,好似如臨大敵咁就冇意思。」


不過對邵仲衡而言,香港始終係個有趣嘅地方,如果可以繼續,佢都希望留喺香港,憑自己力量,為香港帶來一點新鮮空氣。


venue︰21 whitfield hong kong
makeup︰Gigi Lee

不論你對ViuTV持有甚麼態度,你都不能否認它近年為香港娛樂圈捧出一群至少有話題性的年輕面孔。單論《全民造星》系列就為大家「貢獻」出Mirror、Error、P1X3L、Collar四隊組合,再加MC張天賦、Mansonvibes 張進翹、A ...
people
【MenClub People】鍾意,己經夠啦 - Johnny Hui 強尼
30 Sep 2022
第一次親眼「見到」洪嘉豪,是去年年尾在Jace (陳凱詠) 的演唱會上。雖然當晚他只是作為觀眾於台下睇Show,但每到Jace準備邀請嘉賓上台時,我旁邊就會有個不知名男觀眾,不停用洪嘉豪欠他錢沒還似的語氣大叫「洪嘉豪 ...
people
【MenClub People】一步一腳印 - Kaho Hung 洪嘉豪
04 Jul 2022