由上個月開始陸續有員工搬入Apple Park，最近外國網站《Wired》就入去參觀，披露呢艘「Apple Mothership」嘅神秘一面。Apple Park位於美國加州庫帕提諾，係已故教主Steve Jobs嘅遺作，總部以環保為設計為主，總部屋頂放滿太陽能板提供再生能源，而且為貫徹環保同融入大自然嘅理念，總部大樓冇冷氣冇風扇(當然同Steve Jobs唔鍾意開教同風扇有關啦)，當遇到極端天氣時，總部先會利用地下水管發熱同變冷嚟調溫度，而且大樓環型設計有利於空氣流通，所以唔使開窗都都keep到20-25度最舒服嘅室溫。為加強Apple Park嘅綠化工程，Apple特別請到植樹師David Muffly負責種9000棵樹，將來會放喺園內唔同地方，真係變成公園一樣！

造價估計超過50億美元嘅Apple Park佔地280萬平方呎，單係員工健身中心已經有10萬呎，一日真係未必夠參觀。今次有得率先參觀仍然有好多地方未完工，所以未能夠睇晒，但報導講Apple Park已經好有睇頭！好似環型嘅總部就用咗防震設計，成幢可以向任何方向移動4.5呎，以減低地震帶來嘅影響，安全得來亦唔會影響建築物內嘅運作。至於總部嘅超巨型玻璃門亦大有來頭，由德國玻璃製作公司Seele負責(唔係EVA嗰班人)，玻璃門高達85呎，足足有4層棲咁高，而且一隻已經重達44萬磅！

總部室內以木同金屬建造出線條感強嘅簡約空間，而且燈光柔和，每張辦公枱更有掣可以調節高度，睇落仲有幾分似Apple TV Remote添。魔鬼細節係Apple最吸引人，亦係最花時間事間嘅一環，總部嘅門柄、燈槽都慢工出細貨，當係整iPhone咁一絲不苟，佢哋甚至就連Pizza盒都有專利，特登開窿疏氣方便保持Pizza脆口，等員工食得開開心心，真係好細心，我覺得將來有得開放參觀時，一定有會有fans拎佢做手信！