{ SKIP }
文:MenClub Mr.波特  圖:互聯網
POSTED ON 19 May 2017


三冠王可以講係歐洲所有球隊最想達成嘅目標,但同時亦係最難完成嘅夢想,因為首先你需要贏得聯賽冠軍,之後又要奪得本土嘅盃賽冠軍,最後仲要拎埋歐洲最高殊榮嘅歐聯冠軍,而贏到其中一樣已經唔容易,更何況係贏晒三樣呢?




而喺歐洲曾經成為三冠王嘅球隊只有7隊,其中巴塞曾兩次做到,其中最近嘅一次就係2015年安歷基帶領個支巴塞。而宜家又有一支球隊有機會挑戰三冠王呢個稱號,佢地就係成功打入歐聯決賽嘅意甲球隊祖雲達斯。


祖記較早前成功淘汰法甲球隊摩納哥,打入歐聯決賽,將與西甲班霸皇馬爭奪賽事冠軍。



要想成為三冠王,祖記就要喺歐聯決賽前,先奪得意甲聯賽同意大利盃冠軍。而就係週三,憑住丹尼爾艾維斯同中堅邦路斯嘅入球,祖記成功係意盃決賽以2:0擊敗拉素,奪得今季第一個錦標。


而接住黎,祖記就要確保奪得意甲聯賽冠軍啦。目前,意甲聯賽仲有兩輪賽事,而祖記就以4分領先排名第2位嘅羅馬,所以只要祖記喺黎緊嘅兩場比賽再拎多至少3分,咁樣佢地就可以確保奪得今屆意甲聯賽錦標。雖然形勢對於祖記黎講係好好,但係唔好以為佢地一定可以笑到尾。



首先,祖記最後兩場賽事嘅對手分別係克羅托內同博洛尼亞,其中克羅托內相信會比到唔少壓力班馬軍團,因為呢支球隊雖然排名聯賽第18位(降班區),但係正正因為佢地排係呢個位置,所以佢地極需要取得分數黎護級,球員動力充足,必定會同祖記搏命,一個唔小心祖記係佢地身上失分,佢地最後一場比賽嘅壓力就會好大。


另外,意甲收咧日喺5月28日,除非佢地喺下一場聯賽贏波而提前一輪奪得冠軍,如果唔係佢地可能要考慮喺聯賽最後一場為歐聯決賽留力,因為歐聯決賽喺6日之後嘅6月3日舉後,祖記為左避免不必要嘅受傷,可能會收起部份主力。



當然,如果一切順利嘅話,祖記將可以連績第6年奪得意甲聯賽冠軍。咁樣,佢地已經喺國內嘅兩冠王啦,同埋會喺連續三年嘅兩冠王,都咪話唔巴閉。



而對於祖記黎講,兩冠王可能已經滿足唔到佢地,三冠王先係佢地終極目標,而今年亦係祖記三年內第2次挑戰三冠王呢個極奇困難嘅任務,佢地喺2015年嘅時候,就曾經奪得國內兩項冠軍,並殺入歐聯決賽,只係最終不敵巴塞飲恨,同三冠王擦肩而過,所以今次相信祖記將會好好把握呢個機會,務求首次成為三冠王。


可愛!我想講嘅係可愛!
hobby
妹妹就是可口 FOTS JAPAN 1:8 結城美柑
21 Oct 2017
47歲嘅折茂武彥仍然征戰緊日本最高級別籃球聯賽JBL,真係無野可以阻到佢繼續比賽!
hobby
【老將不死】籃球版三浦知良 - 47歲折茂武彥
20 Oct 2017