今年1月先推出嘅Word Lens係Google翻譯app嘅其中一個主打功能，大家只要喺Google翻譯入面撳下相機icon，就可以用即時翻譯到鏡頭拍緊嘅文字，而Google最近就幫呢個功能升級，仲一次加入20種語言，兼且對應即時語音翻譯，大家以後去旅行有佢就掂。

本來利用鏡頭即時翻譯嘅Word Lens只得7種語言，今次一口氣新增保加利亞語、加泰羅尼亞語、克羅地亞語、捷克語、丹麥語、荷蘭語、菲律賓語、芬蘭語、匈牙利語、印尼語、立陶宛語、挪威語、波蘭語、羅馬尼亞語、斯洛伐克語、瑞典語、土耳其語同烏克蘭語，仲有只可以單向英譯泰語同印度語，合共20種語言但就冇中文，不過唔緊要啦，反正大家都識睇。

試用Word Lens發現佢對於辨認單字反應快而準，但當要翻譯一段文字時就會冇咁準，建議大家都係影咗相先慢慢再翻譯。除此之外，Google翻譯亦加強語音翻譯嘅速度，試過you seem like fun、i go to school by bus同shame on you都一樣冇問題，基本上講英文好多都可以順利譯做其他語言，不過讀咗好多次都硬係譯唔到I am very thanks them，美中不足囉。